مکران ءَ سیادی داروکیں بلوچ ملایانی آجوئی ءُ پاکستان ایردست بوھگے سر ءَ باوست کنگ بوتگ، گیشتریں ملایاں راجی آجوئی ءِ پلّہ مرزی ءُ ایردستی ءِ بگیری ءَ سلاہ بندیں جھد اسلام ءِ نیمگ ءَ ھک ءِ جنگ لیک اِتگ ءُ چہ کران ءُ ھدیساں درور پیش داشتگ۔ وھدیکہ ملا شاہ میر عزیز ءُ غلام اللہ رستم ءَ پاکستان ءِ چیردست بوھگ اسلامی یے گوشتگ-
مکران ءَ سیادی داروکیں ملایاں چاگردی رسانکدر ءِ یک وٹسپی دیوانے ءَ راجی ایردستی ءُ بلوچستان ءِ آجوئی ءِ باروا گپ کرتگ ءُ کران ءُ سُنت ءِ سر ءَ چمشانک داتگ ءُ درور پیش کرتگ- گیشتریں ملایاں راجی ایردستی یک پِٹ ءُ اسلامی لوٹانی رد ءَ جنگ کنگ ءُ جھد ءِ بنیاد ءَ ایردستی ءِ ھلاس کنگ ءِ سر ءَ گوشتگ کہ اسلام ءَ دری زوراک ءُ زورگر ءِ بگیری ءَ جنگ ءِ تیوگیں بھرگ تچک کرتگ اَنت ءُ ھُدا ءِ گُڈی پیگمبر ءَ مردمان ءَ آجوئی ءِ درونت داتگ ءُ ڈنی زوراکانی ایردستی ءِ بگیری ءَ کینگ ءُ پہ آجوئی ءَ جنگ کنگ ءِ سکین داتگ-
بلوچ ملایاں پیگمبر ءِ گوں وتی سرڈگار ءَ مھر ءِ درور داتگ ءُ گوشتگ کہ وھدے پیگمبر چہ کاپرانی زوراکیاں تنگ بیتگ ءُ مدینہ ءَ روگ ءَ بیتگ آئی گوں ارسگیں چماں مکہ ءِ نیمگ ءَ چارتگ ءُ گوشتگ اے مکہ گواہ بو من پد الّم پرتو کایاں ءُ ھمد ءَ جھمنند باں-
آھاں گوشتگ کہ چہ ایشی ءَ گیش گوں وتی سرڈگار ءَ مھر کنگ ءِ درور چے بہ بیت-
آھاں گیشتریں درور داتگ کہ شریت ءَ سرڈگار ءِ پھازداری پرز اِنت، ھدیساں ھست انت کہ کجام چم پہ وتی سرڈگار ءِ پھازداری ءَ بے واب بہ بیت پہ آئی ءَ جھنم ھرام اِنت ءُ بھشت پہ آئی ءَ روا اِنت- چہ ایشی ءَ گیش اسلامی درونتانی تہ ءَ آجوئی ءِ بستار دگہ چے بہ بیت-
ملاھاں گوشتگ کہ پہ وتن ءِ آجوئی ءَ وھدے کشمیر، پلستین، چیچنیا ءُ اوگانستان ءَ جنگ پرز اِنت گڑا پہ بلوچستان ءِ آجوئی ءَ پرچہ نہ اِنت- ھمے گپانی سر ءَ ھیال گور کنگ ءُ بلوچ ملایاں آجوئی ءِ جنگ ءِ پلّہ مرزی کنگ لوٹ ایت-
آھاں گوشتگ ھما سرمچار کہ کوھاں در کپتگ اَنت ءُ وتی ساہ ءُ سرانی دیمونی ءَ دیگ ءُ پہ آجوئی ءَ جنگ کنگ ءَ اَنت اے ھک ءِ جنگ ءِ یک بھرے ءُ اگاں ھمے راہ ءَ کسے شھید بیتگ آئی ءَ جنت ءَ جوانیں جاھے رس ایت-
آئی ءَ پدائی شاری ءِ گرانبھائیں دیمونی ءِ گپ کرتگ ءُ گیشتریں ملایاں ھمے گوشتگ کہ ڈنی زورگر ءِ بگیری ءَ ایردستیں راج ءِ گُڈی سلاہ جنگ اِنت ءُ جنگ ءَ کجام وڑ ءَ مڑگ ھک اِنت- شاری ءَ پدائی اُرش کرتگ ءُ دری دُژمن گیش ءَ چہ گیش تاوان داتگ-
اے باوست ءَ بھر زورکیں ملا شاہ میر عزیز ءُ غلام اللہ رستم بلوچ ءِ آجوئی ءِ جنگ ایر جتگ ءُ گوشتگ کہ پاکستان زورگر نہ اِنت مئے ڈیھ اِنت ایشی ءِ بگیری ءَ تُپنگ چست کنگ ءُ سیاسی گھگیری کنگ اسلام ءِ درونتانی رد ءَ ٹوھیں گناھے ءُ آیانی بگیری ءَ ریاست ءِ کاروائی کنگ ھژدری اِنت- پاکستان اسلامی ریاستے ءُ کسے ءَ اسلامی ریاست ءِ بگیری ءَ جنگ کنگ ءِ ھک نیست-
آئی ریاست ءِ زوراکیں شوربندیانی پلّہ مرزی کرتگ ءُ گوشتگ کہ سرکشی کنگ ءِ بگیری ءَ کاروائی کنگ ءِ پرمان ءَ اسلام ءَ داتگ-
آئی گْوشتگ کہ شاری ءِ پدائی اُرش ناھک ءُ اسلام ءِ تہ ءَ وتکشی ھرام اِنت۔ شاری ءَ وتکشی کرتگ اسلام وتکشی ءِ موکل ءَ نہ دنت-