منی پت سند ءِ پولیس ءِ کمک ءَ آوار جنگ ءُ بیگواہ کنگ بوتگ – سعیدہ حمید

بیگواھیں عبدالحمید زہری ءِ زھگ سعیدہ حمید ءَ چہ سند ءِ سرکار ءَ لوٹ کتگ کہ بیگواھیں مردمانی ھاتر ءَ انکوائری کمیٹی ءِ اڈ دیگ بہ بیت –

سعیدہ حمید ءَ گوشتگ کہ بلاول بھٹو زرداری بیگواھیں مردمانی کھول ءِ سر ءَ سند پولیس ءِ لٹ شاپیءِ بگیری ءَ انکوائری کمیٹی ءَ ابید چہ سند ءَ بلوچانی زورانسری آوار جنی ءِ سر ءَ ھم کمیٹی ءِ اڈ بہ دنت –

سعیدہ حمید ءَ گوشتگ کہ منی پت عبدالحمید زہری چہ کراچی ءَ سند پولیس ءِ کمک ءَ زورانسری آوار جنگ ءُ بیگواہ کنگ بوتگ –

بیگواھیں عبدالحمید ءِ زھگ ءَ گوشتگ کہ منی پت ءِ زورانسری آوار جنی ءِ سوب ءَ مئے وانگ ءُ زانگ متاثر بوتگ – ھر ھما وھد ءَ بیگواھیں مردمانی کھول زھرشانی کن انت گڈا پولیس اڈاند جوڈ بیت –

زانگ بہ بیت ھزدار زہری ءِ جھمنند عبدالحمید زہری گوستگیں سال ءِ دھ اپریل ءَ چہ کراچی ءَ زورانسری آوار جتگ – عبدالحمید ءِ کھول ءِ رِد ءَ عبدالحمید چیرین ادارھانی کارمنداں سند پولیس ءِ ھمراھی ءَ کراچی ءِ دمگ گلستان جوھر ءَ چہ جندے گِس ءَ آئی ءِ پجار کنگ ءَ پد آوار جتگ ءُ گوں وت برتگ –

عبدالحمید ءِ زھگ سعیدہ حمید گوستگیں سال ءِ بیت کہ وتی پت ءِ یل کنائینگ ءَ زھرشانی کنگ ءَ انت – سعیدہ حمید ءَ سند ءِ سرکار ءُ انسانی ھکانی ادارھاں چہ لوٹ کتگ کہ آئی ءِ پت ءِ یل کنگ ءَ وتی کرد ءَ پیلو بہ کن انت –