کھول ءِ ھمراہ داری ءَ بگیر کس ھچ کرت نہ کنت – سمی دین

وائس فار بلوچ مسنگ پرسنز ءِ رھشون سمّی دین بلوچ ءَ چاگردی ترامجاہ ٹویٹر ءَ وتی ٹویٹ ءِ تہ ءَ گوشتگ کہ بیگواھیں نودربرانی یل بوھگ ءَ دل وش بوت کہ لٹ کٹ دزگیری مپت نہ شُتاں، بیگواھیں مردمانی کھولاں پگر کنگ لوٹیت کہ بید آھاں ھچ کس ھچ کرت نہ کنت-

سمی دین بلوچ ءَ نبشتگ کہ دودا ءُ گمشاد یل بوھگے ھال سربوتگ دل وش بوتگ کہ مئے مات، گھار ءُ براتانی سرا کنگ بوتگیں لٹ شاپی ءُ دزگیری مپت نہ شُتگ انت –

آئی بیگواھیں نودربرانی کھول ءِ زھرشانیانی نیمگ ءَ اشارہ کتگ گوشتگ کہ بیگواھیں مردمانی کھولاں زانگ لوٹیت کہ کجام وڈا وتی بیگواھیں مردمانی یل کنائینگ ءَ گھگیری کنگی انت پرچاکہ تاں ھما وھد ءَ کھول ھمراہ داری نہ کن انت گڈا کس ھچ کرت نہ کنت –

زانگ بہ بیت ھردو نودربرانی زورانسری آوار جنی ءِ بگیری ءَ یکشمبے ءِ روچ ءَ مزنیں کچ ءَ مردماں کراچی پریس کلب ءَ بگر تاں سند اسمبلی ءَ روانک کشگ ءِ کوشست کرتگ ات بلے سند پولیس ءَ آ فوارہ چار راہ ءِ سر ءَ داشتگ انت –

کہ ھمود ءَ زھرشانی کنوکاں نندانک جتگ ءُ پدا رند ءَ زھرشانی کنوکاں درسیں آڈاند سرگوز کرتگ انت سند اسمبلی ءِ دیم ءَ سربوھگ ءَ سوبین بوتگ انت –

گوستگیں روچ ءَ زھرشانی کنوک ءُ سی ٹی ڈی ءِ گوم ءَ گند نند ءَ پولیس ءِ اگدہ دار نہ اتکگ انت کہ آئی ءَ پد زھرشانی کنوکاں سروزیر ءِ کارگس ءِ نیمگ ءَ رونک کشگے کوشست کتگ پولیس ءَ دیم رؤگ ءَ داشتگ انت گڈا زھرشانی کنوکاں سروزیر کارگس ءِ روگ ءِ بدل ءَ سند اسمبلی دیم ءَ شتگ انت – اشی ءَ پد پولیس ءَ زھرشانی کنوکانی سر ءَ لٹ شاپی کتگ ءُ زھرشانی کنوک دزگیر کتگ ءُ پولیس تانہ ءَ برتگ انت –

زھرشانی کنوکانی سر ءَ لٹ شاپی ءِ تامر ھما دمان ءَ چاگردی ترامجاھاں شنگ ءُ تالان بوتگ انت وھدیکہ بیست ءُ ھشت زھرشانی کنوک دزگیر بوتگ ات کہ آھانی تہ ءَ وی بی ایم پی، بی وائی سی ءِ رھشوناں ھوار بیگواھیں مردمانی کھول ھم ھوار بوتگ انت کہ پدا شپ ءَ بے وھد یل کنگ بوتگ انت –

ایمنسٹی انٹر نیشنل ءَ پرایمنیں زھرشانی کنوکانی سر ءَ لٹ شاپی ترندی ءَ گوں ایر جتگ –

ایمنسٹی انٹر نیشنل ءَ وتی ٹویٹ ءَ نبشتگ کہ وتی دوستیگیں مردمانی ھاتر ءَ توار چست کنوکیں کھولانی سر ءَ لٹ شاپی، کریک ڈاؤن کنگ زورانسری آوارجنی ءِ اے زوراکی ءَ گیش کنت –

پاکستان ءِ انسانی ھکانی کمیشن سرکماش اسد اقبال بٹ ءَ پولیس ءِ لٹ شاپی ایرجتگ ءُ گوشتگ کہ کانود جوڈ کنوکیں ادارھاں کراچی شھدربر جاہ ءِ نودربر گیرکانودی بید رھبندی آوار جتگ ءُ آھان آمیدگس ءَ آرگ ءِ بدل ءَ بیگواہ کتگ انت ءُ آھانی آوارجنی ءِ بگیری ءَ نودربر پرایمنیں زھرشانی ءِ کنگ ءَ بوتگ کہ بے سوب ءَ آھانی سر ءَ لٹ شاپ کنگ بوتگ –