پنجگور ءَ ڈی سی کارگس ءِ دیم ءَ کُشت ءُ کوشانی بگیری ءَ نندانک

مروچی بلوچستان ءِ دمگ پنجگور ءَ مزنیں کچے ءَ مردماں زھگ ءُ زالبولانی ھمراھی ءَ روانکے کش اِتگ ءُ ڈپٹی کمشنر ءِ کارگس ءِ دیم ءَ نندانک جتگ ، زھرشانی کنوکاں بیگواھیں پولیس کارمند باب جان ءِ یل کنگ ءُ ورنائیں فٹبالر داد جان بلوچ ءِ کشندھانی دزگیری ءِ لوٹ کُتگ –

زھرشانی کنوکانی گوشگ ات کہ چار جون ءَ ناشناسیں مردماں پولیس کارمند باب جان جھمنند پنجگور وشبود پولیس تانہ ءِ نزیک ءَ آوار جتگ ءُ گوں وت برتگ کہ ھنگت بیگواہ انت – آئی ءِ درگت ءَ ھچ وڈیں سرپدی نیست کہ کجا انت – اشی ءَ ابید زھرشانی کنوکاں گوستگیں ماہ ءَ کُشگ بوتگیں فٹبالر داد جان بلوچ ءِ کشندھانی دزگیری ءِ لوٹ کتگ –

زانگ بہ بیت گوستگیں ماہ ءَ پنجگور ءِ دمگ خدابادان ءَ ناشناسیں سلاہ بندیں مردمانی تیرگواری ءَ ورنائیں فٹبالر داد جان بلوچ بیران بوتگ ات – آئی ءِ کھول ءِ مردماں اولسر ءَ دادجان بلوچ ءِ کُشندھانی دزگیر نہ کنگے بگیری ءَ زھرشانی ءِ کُتگ ات ءُ پدا رند ءَ یک ھپتگ ءَ تاں ڈی سی کارگس ءِ دیم ءَ نندانک ءُ پدا سی پیک شھدگ بند کرتگ ءُ ھمود ءَ نندانک جتگ پدا رند ءَ وھدیکہ آھانی گوں دمگی واکداراں گند نند بوتگ ات گڈا نندانک ھلاس کنگ بوتگ ات –

بلے کھول ءِ گوشگ انت کہ ھما لوٹ دمگی واکداراں منّ اِتگ انت ءُ گوں آھاں گند نند کُتگ بلے آھانی تہ ءَ تنی وھدی یک لوٹ ءِ سر ءَ ھم گامگیج زورگ نہ بوتگ –