زاکر مجید ءِ زورانسری آوار جنی ءَ سیزدہ سال سرجم، شال ءَ زھرشانی

بلوچ اسٹوڈنٹس آرگنائزیشن آزاد ءِ بیگواھیں کسان کمک سرکماش ءِ سیزدہ سالاں بیگواھی ءُ بلوچستان ءَ بیگواھیں مردمانی روچ ءِ درگت ءَشال ءَ زھرشانی کنگ بیتگ – زھرشانی ءَ بیگواھیں مردمانی کھول، سیاسی ءُ چاگردی گلانی رھشوناں ھوار بازیں کچے ءَ نودربر ھوار بیتگاَنت-

زھرشانی ءَ بیگواھیں سیاسی رھشون زاکر مجید بلوچ ءِ مات، بیگواھیں انسانی ھکانی باسک راشد ھسین ءِ مات، بیگواھیں کفایت اللہ ءِ کھول،سجاد ءِ گوھار، ھزدار ءِ جھمنندیں بیگواھیں آصف ءُ رشید ءِ گوھار سائرہ بلوچ، نوشکی ءَ زورانسری آوار جنی ءِ آماچیں نصیب اللہ ءِ کھول،چہ شال ءَ بیگواہ کنگ بیتگءِ انجینئر ظھیر بلوچ ءِ گوھار ءَ ھوار دگہ بیگواھیں مردمانی کھول ھوار بیتگ اَنت-

زھرشانی ءَ گپ کنان ءَ زاکر مجید بلوچ ءِ مات ءَ گوشتگ کہ منی زھگ زاکر مجید ءِ بیگواھی ءَ بازیں سال گوستگ اَنت بلے داں روچ ء مروچی ءَھچ آمیدگس ءَ پیش کنگ نہ بیتگ – زاکر مجید ءِ مات ءَ گُشتگ من جست کنگ لوٹ آں منی زھگ ءَ گناہ چی کرتگ اے زنداناں دراجیں مدتے ءِ ودارءَ پد ھم منی زھگ یل کنگ بیگ ءَ نہ اِنت-

زاکر مجید ءِ مات ءَ گشتگ منی زھگ ءِ گناہ بس ھمیش اِنت آ یک سیاسی باسکے بیتگ ءُ وتی ھکانی واستا توار چست کنگ ءَ بیتگ – آئی ءَگُشتگ کہ زاکر مجید ھزدار ءِ اولی بیگواھیں مردم اِنت، بیگواھیں مردمانی بنجل زاکر مجید ءِ یل کنگ ءَ برجم دارگ بیتگ مروچی اشی ءَ ھزاراںزھگانی اکس ایر کنگ بیتگ اَنت کہ اے ھمے بے کانونی ءَ بیگواہ کنگ بیتگ اَنت- آئی ءَ گُشتگ داں زندگاں زھگ ءِ یل کنگ ءَ جد ءُ جھد ءَ برجاہداراں مئے واستا دگہ ھچ راہ پش نہ کپتگ اد ءَ سیاسی مردم ووٹ ءِ سیاست ءَ کنگ ءَ اَنت بلے مئے زھگانی واستا توار چِست نہ کن اَنت-

زھرشانی ءَ جاڑیگیں چار ماہ ءَ پیسر بلوچستان ءِ دمگ منگچر ءَ زورنسری آوار جنی ءِ آماچیں کفایت اللہ ءِ کھول ءَ گوشتگ کہ کفایت اللہریاستی ادارھاں مئے دیم ءَ دزگیر کرتگ ءُ پد ءَ بیگواہ کرتگ منی دو کسانوکیں تپل اَنت آ وت بیمار اِنت – کفایت اللہ ءِ کھول ءَ گُشتگ وتی لوگواجہ ءِ یل کنگ ءِ لوٹ ءَ کن آں آئی ءِ لوگ واجہ یک استادے آئی ءَ ھچ گیر کانونی راہ گچین نہ کرتگ اگاں آئی ءَ دگہ جرمے کرتگ گڑا آمیدگس ءَپیش کنگ بہ بیت اِنت –

بیگواھیں راشد ھسین ءِ مات ءَ گُشتگ کہ آئی ءِ زھگ ءِ بیگواھی ءَ چار سال سرجم بیتگ آئی ءَ گُشتگ ھمے سال ءِ بیست ءُ یک جون ءَ راشدھسین ءَ پاکستان ءِ دست ءَ دیگ ءَ سَے سال سرجمی بیگ اِنت چریشی ءِ ھلاپ ءَ شال پریس کلب ءِ دیم ءَ زھرشانی کن آں-

راشد ھسین ءِ مات ءَ زھرشانی ءَ ھواریں مردمانی گون ءَ دزبندی کرتگ ءُ گُشتگ کہ بیست ءُ یک جون ءَ بیوکیں زھرشانی ءَ بھر بہ زور اَنت زھگ ءِیل کنگ ءَ منی توار جوڑ بہ بنت-

زھرشانی ءَ سعیدہ بلوچ ھم ھوار بیتگ آئی ءِ رد ءَ آئی ءِ برات سجاد اھمد ءُ برات زتک ظھور اھمد ریاستی ادارھاں شال ءَ آوار جتگ ءُ برتگ اَنت- زھرشانی ءَ تران کنان ءَ سعیدہ بلوچ ءَ گُشتگ بیگواھیں مردمانی درداں بس بیگواھیں مردمانی کھول سرپد بنت اد ءَ مئے مات شپانی شپدرانی دپ ءَ بند نہ کن اَنت بلکیں آیانی زھگ یل بنت ءُ کاینت –

آئی ءَ گُشتگ کہ پاکستان ءِ وتی آئین ءُ کانون زورانسری آوار جنیانی موکل ءَ نہ دنت اگاں بیگواھیں مردماں جرم کرتگ گڑا آیاں وتی آمیدگساںپیش بہ کنت ھک ءُ ھکوک بہ کنت اے چونیں ریاستے بلوچ ماتانی ھرساں نہ گند ایت-

بیگواھیں ظھیر بلوچ بلوچ ءِ گوھار عظمیٰ بلوچ ءَ گُشتگ کہ من ءَ گوشگ بہ بیت من وتی برات ءَ کجا شوھاز بہ کن آں اے ھشت ماہ نہ اَنت ھشتسال اَنت – مئے برات ءِ سر ءَ اگاں جرمے ھست گڑا آمیدگساں پیش کنگ ءُ انساپ دیگ بہ بیت-

چہ نوشکی ءَ بیگواھیں نصیب اللہ ءِ مات ءَ زھرشانی ءَ ھواریں مردماں گوں دزبندی کتگ کہ زھگ ءِ یل کنائنگ ءَ وتی کرد ءَ پیلو بہ کن اَنت-

سائرہ بلوچ ءِ گوشگ اَت آئی ءِ برات ءُ ناکوزھگ آصف ءُ رشید نوشکی ءَ پکنک ءِ وھد ءَ بیگواہ کنگ بیتگ اَنت چریشی ءَ ہد سیکورٹی فورسز ءَآیانی دزگیر کنگ من اتگ بلے داں انگت ءَ ھچ آمیدگساں پیش کنگ نہ بیتگ اَنت برات ءُ ناکوزتک ءِ گیر کانونی آوار جنی ءِ ھلاپ ءَ ھمک در ٹکاِتگ اَنت بلے ھچ انساپ نہ رس اِتگ-

ھمے وھد ءَ کھولاں گوں گپ کنان ءَ ماما قدیر بلوچ ءَ گُشتگ کہ بیگواھیں مردمانی یل کنائینگ ءَ اے بنجل ءِ بنھشت زاکر مجید ءِ بیگواھی ءِ وھد ءَآئی ءِ گوھار فرزانہ مجید ءَ برجم داشتگ ھمود ءَ ما اے جد ءُ جھد ءِ بندات کرتگ ماما قدیر بلوچ ءَ گُشتگ کہ اے دراجیں جد ءُ جھد ءَ مئے بازیںھمراہ شھید بیتگ اَنت بیگواھیں مردمانی یل کنگ ءَ داں اے جد ءُ جھد برجم دارگ بیت اِنت-

زھرشانی ءَ تران ءَ نیشنل پاٹی ءِ دمگی سروک نیاز بلوچ ءَ گوشتگ کہ مردمانی آوار جنگ ءَ تچکی ءَ ریاست ءُ آئی ءِ ادارہ ھوار اَنت ڈیھ ءِ کانونھچ کس ءَ اے موکل ءَ نہ دنت کہ کجام ھم شھری ءَ آوار بہ جن ءُ بیگواہ بہ کن اگاں کسے ءَ جرمے کرتگ گڑا آمیدگس ءَ پیش کنگ بہ بیت اِنت اد ءَبازیں سالاں چہ بیگواھی ءَ پد آیانی لاش چگل دیگ بنت بلے اد ءَ جست کنوک نیست اِنت-

ایکٹویسٹ بیبرگ بلوچ ءَ وتی تران ءَ گُشتگ کہ زاکر مجید منی سیاسی استاد بیتگ آ سیزدہ سالاں زندانانی تہ ءَ اِنت مارا بیگواھیں مردمانیدرد سما بنت زاکر مجید ءِ مات ءَ بازیں سالاں وتی پریات زرتگ ءُ پریس کلب ءُ آمیدگساں ترگ ءَ اِنت بلے اد ءَ بلوچانی واستا انساپ نیست اِنتریاست اد ءَ مردمانی لوگاں دور کنت ءُ آوار جنت بلے لھتے روچاں پیش پنجاپ ءَ لاھور ءَ اے وڑیں وئیل بیتگ اَنت رسانکدراں ٹاہ مچ اِتگ ءُ ھمےامل ءَ ریاستی ادارہ بلوچستان ءَ کنگ ءَ اَنت لوگانی تہ ءَ دور کن اَنت مردماں جن اَنت بیگواہ کن اَنت آیاں ھچ جست کنوک نیست اِنت نانکہرسانکدر پیشدراھی کن اَنت-

زھرشانی ءَ تران کنان ءَ وائس فار بلوچ مسنگ پرسنز ءِ سروک نصراللہ بلوچ ءَ گُشتگ کہ مروچی سرجمیں بلوچستان ءَ ھوار پاکستان ءِ کُنڈ کُنڈ ءَبلوچاں بیگواہ کنگ ءَ اَنت وھدیکہ سروزیر اد ءَ اتکگ گڑا آئی ءَ وتی بے واکی پدر کرتگ آئی ءَ گُشتگ آ واکد داروکیں مردماں گوں گپ کنت اد ءَمھلوک ءِ نمائندگ کُرسیانی واستا تلوسگ ءَ اَنت بیگواھیں مردمانی گپ ءَ نہ جن اَنت-

نصر اللہ بلوچ ءَ زھرشانی ءِ ھلاسی ءِ جار جنان ءَ ڈیھی ادارھاں بیگواھیں مردمانی توار ءِ گوشدارگ ءُ انساپ کنگ ءِ لوٹ کرتگ-

دومی نیمگ ءَ بیگواھیں مردمانی روچ ءِ درگت ءَ چاگردی ترامجاھاں بلوچ سوشل میڈیا ایکٹویسٹ ءُ بی ایس او آزاد ءِ باسکانی نیمگ ءَ زورانسریآوار جنی ءُ زاکر مجید ءِ یل کنگ ءِ درگت ءَ آن لائج کیمپئن برجم داشتگ –