وی بی ایم پی ءِ زھرشانی بنجل ءَ چار ھزار ءُ شش سد ءُ شست ءُ نھ روچ سرجم بوتگ انت

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ شش سد ءُ شست ءُ نُھ روچ سرجم بوتگ انت – دانشور محمد علی تالپور، یکجھتی کمیٹی ءِ ماھرنگ بلوچ ءُ دگہ زالبولاں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

اتکگیں مردمانی میان ءَ تران کنان ءَ ماما قدیر بلوچ ءِ گوشگ ات کہ زالبول ھردو سنگراں جوانیں کردے پیلو کرت کن اَنت- آ جنگ ءِ پِڑ بہ بیت یا سیاست، بلوچ جنیناں پُر ایمنیں جھد ءَ جوانیں کردے پیلو کرتگ ءُ وت ءَ منارینتگ۔ چہ ٹکی کوھنیں رواج ءَ آجو بیتگ ءُ جھد ءِ تہ ءَ وتی کرد ءَ جوانیں وڑے ءَ پیلو کنگ ءَ اَنت – اے راستی انگت ءَ برجاہ اِنت کہ جنیناں پہ جھان ءِ دیمروئی ءِ جھد ءَ یک جوانیں کردے پیلو کرتگ، بلے پہ جنینانی تہ ءَ آشوب آرگ ءَ مردینانی زھنانی تہ ھچ وڑیں آشوب نہ یتکگ-

ماما کدیر گوشتگ کہ پُر ایمنیں جھد پہ زوراکیاں نزور ءُ ایردستیں راج ءِ چہ توانمندیں زوگر ءِ بگیری ءَ بیگواھیں مردمانی آجوئی ءُ پہ ھمے زوراک ءِ زورگری ءِ ھلاس کنگ ءَ برجاہ دارگ بیت-

آئی گوشتگ کہ اگاں ھیال ءَ گوْر بہ کن ئے اے گپ ءِ بابت ءَ جھان سرپد اِنت ءُ زھگ زھگ اے گپ ءَ زانت کہ بلوچ ءِ بیگواھیں مردمانی زورانسری بیگواھی ءُ دزگیری ءَ پد شھید کنگ ءَ پاکستانی پوج ءُ چیریں ادارہ کنگ ءَ اَنت – پہ ارزانی ئیں لبزاں پاکستانی لشکری ادارھاں اے راستی ءِ گپ گوشگ نہ بیت-

ماما کدیر دیمتر ءَ گوشتگ کہ پاکستانی پارلیمنٹ ءِ کارکنانی گپاں دلگوش بہ کن ئے تہ رند ءَ ھمے گوشگ کپ ایت کہ آ پہ وتی لشکر ءُ چیریں ادراھاں تیوگیں زوراکیانی چیر دیگ ءَ اَبید بلوچ ءِ پُرایمنیں جھد ءِ دارگ ءَ بے سوب بیتگ اَنت۔ پاکستانی ریاست چہ وتی لشکر ءِ زوراکی کاروائیاں بلوچ جھد ءِ دارگ ءَ دارگ لوٹ ایت۔ بلکیں آ اے گپ ءَ بے ھال اِنت کہ نوزدہ سد ءُ ھپتاد ءُ سَے ءَ ایرانی جنگی بالیگانی کمک ءَ بلوچ سرڈگار ءِ سر ءَ ھونریچی ءَ پد بلوچانی توار ءِ دارگ ءَ بے سوب بیتگ –