آشوب ء گْوستانک
نبشتہ کار: میار دشتی
اولی بھر
دی بلوچستان پوسٹ
آشوب وھدیکہ آشوب شھراں گِران ءُ مئے کُچگ ءُ میتگاں ایرّچان بیت تو دیست اسکول ءُ اسپیتالانی دیوالاں نبشتہ کنگ بیت آجوئی آجوئی یا بلوچستان زندگ بات پاکستان مردگ بات ھمے وڑ گِندگ ءَ اَتک کہ آشوب ءَ را وتی بانزُل پچ کُتگ اَنت بلے آشوب چیر اَت کسّ ءَ را اِے زانت نیست اَت کہ اِے دیوالانی نبشتہ کنوک کَے اَنت؟ چیا کہ سیاسی مردُم ھست اِت انت بلے کسّ ءَ نزانت کہ کَے اَنت سیاسی مردم وتی کار ءَ چیر ءُ گاری کنگ ءَ اِت انت پد ءَ دومی نیمگ ءَ سلاھبند ءُ دموکہ بندیں ناشُناسیں مردُمانی رنگ ءَ آشوب مارا ھم گِندگ ءَ اَتک مئے دمگ ءُ میتگ ءِ مردُماں کسّ ءَ شُناس کُت نہ کُتگ انت بلے بازاراں ھمے ھبر ءَ ڈاہ کُتگ اَت کہ دوشی پلاں جاگہ ءَ اُرشے بیتگ پد ءَ ھمے اُرشکار اِے کوہ ءَ پُترتگ انت-
برے تو دیست مردُم ھبرایاں کہ اِے ٹیک اَنت، دوز اَنت جنگ کن انت ءُ کایاں پد ءَ کوہ ءَ پُتر اَنت گپ ایش اَت کہ اِے دموکہ بندیں مردُم بازار ءُ میتگانی چَکّ ءَ نہ کپت اَنت یا کہ جنگلے ءَ اشاں وتی دمے بالا کُت یا تو دیست کہ دیم پہ کوہ ءَ روگ ءَ انت اگاں میتگ ءَ اشاں مردُمے یا سنگتے وتی جوڑ کُتگ اَت گڑا آ ھم چیر گٗور کس ءَ را اِے گمان ھم نہ کُت کہ پلانی اِے مردُمانی مردُم اِنت چیا کہ بس اِے کار چیریں گاماں گوں جنزان ءُ دیم ءَ روان اَت، چوناھا گوریلہ وار ءِ سرپدیں سوھوانی ھمے زانِشت بیتگ کہ گوریلہ جُنز ءِ اولین پرز آئی ءِ چیر ءُ گاری اِنت ناشُناسی اِنت چیری گوریلہ جنگ ءِ اولی اسول اِنت ما سلاھبندیں مردُمانی تہ ءَ ھمے چیز دیست چیر ءُ گاری-
ھمے وھدیکہ ھمراھے ءَ اِے ناشُناسیں مردُم ھم روان اِت انت گڑا بلاھیں مُدّتے گْوست وھد ءَ را وتی دیم ھم مٹ کُت تو دیست اِے دموکہ دروشمیں مردُمانی سیادی میتگانی تہ ءَ گیشتر آباد بیان بیت چیا کہ آ وھد ءَ میتگ ءَ یکّے یا دو آ مردماں گوں بندوک اَت گڑا اِے وھد ءَ ھر لوگے ءَ یک سلاھبندے مارا گِندگ ءَ اَتک اِے ھمے سلاھبند اِت انت ما اشاں جنز ء نوکیں سپاھی ءِ نام داتگ اَت بلے اِے نوکیں سپاھی وت نزانگ ءَ اِت انت کہ ما سلاھبندیں پرچا؟ اِے توپک ما پہ چیا بڈّا کُتگ ءُ پہ کَے ءَ بڈّا کُتگ؟ اِے نوکیں سپاھی اے چیزّ ءَ سرپد نہ اِت انت چیا کہ اشاں چے لھتے پہ مپاد ءُ لھتے پہ شوک جُنز ءَ گوں کپتگ اَت-
اِے وھد ءَ آشوب ءَ را اَنچوش دنز کُتگ اَت چو دشت ءِ گرماگی بیگاہ ءِ گْواتانی وڑ ءَ ھرچیز تو چار اِت ترا آشوب گِندگ ءَ اَتک چیا کہ ھرنیمگ ءَ بس آشوب آشوب دیولانی سر ءَ آشوب ،دگانی سر ءَ آشوب ،میتگاں آشوب، جنگل ءَ آشوب آشوب ءَ سرجمیں ھلک میتگ ءُ دیار وتی انگِرّ ءَ کُتگ اِت انت بلے اِے وھد ءَ آشوب نوکیں سپاھیانی کْوار ءَ اَت ءُ چو کیچ ءِ تُپّان ءَ میتگاں لپاشان اَت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔