بلوچستان ءِ سیمسری دمگ چاگی ءِ ھند نوکنڈی ءَ گوستگیں شپ ءَ پاکستانی پوج ءِ تیرگواری ءُ ڈرائیور ءِ کوش ءِ ھلاپ ءَ زھرشانی برجاہ اِنت-
دی بلوچستان پتر ھال ءَ سر بیتگیں ھالانی رد ءَ دالبندین ءَ آر سی ڈی ءِ شھدگ بند کنگ بیتگ ریلوے ٹریک ءِ سر ءَ ھم زھرشانی ءُ روانی مھتل-
دومی نیمگ ءَ شھر ءَ سرجم ءَ دربندیں ھرتال ءُ چریشی ےِ سبب ءَ باپاری بنجل بند ءُ دگانی سر ءَ روانی نا بروبری ءِ ھساب ءَ اِنت-
سیمسری ءِ دمگ ءَ باپاری کنوکیں کسانوکیں گاڑیانی ڈرائیورانی رد ءَ پھزداری ءِ نام ءَ کارندھاں ویران سیمسر ءِ ھند ءَ دو سد ءِ کچ ءَ گاڑی ریڈیٹرزاں ھاک مان کتگ ءُ بیٹریز کش اِتگ اَنت ءُ ڈرائیور ھشکیں دستاں گوں یل داتگ اَنت-
آئی ءَ گُشتگ شش کلاک ءَ پند ءَ سپر کنگ ءَ پد یک گاڑی ءِ سر بیتگ ھمیشی ءَ مارا نوکنڈی ءَ رسینتگ ءُ سک گرم اِنت اود ءَ بازیں ڈرائیورے تن ءُ شد ءَ پس اِتگ اَنت-
زانگ بہ بیت گوستگیں شپ ءَ بلوچستان ءِ دمگ چاگی ءِ ھند ڈیورنڈ لائن ءِ سر ءَ پاکستانی پوج ءَ تیرگواری ءَ چہ بیران بیتگیں ڈرائیور کوش ءِ ھلاپ ءَ زھرشانی بندات بیتگ زھرشانی ءَ دگہ ھشت مردم زدگ بیتگ اَنت مروچی ھمے وئیل ءِ ھلاپ ءَ زھرشانی ءُ شھر بند اَنت-