نوکنڈی: پاکستانی پوج ءِ زھرشانی کنوکانی سر ءَ تیرگواری ، ھشت مردم زدگ

گوستگیں روچ ءَ پنچ شمبے ءَ بلوچستان دمگ چاگی نوکنڈی ءَ ڈیورنڈ لائن سر ءَ پاکستانی پوج ءِ تیر گواری ءَ بیران بوتگیں گاڑی ڈرائیور ءِ کوش ءِ بگیری ءَ زھرشانی کنوکیں مردماں پاکستانی پوج ءِ بنجل ءَ بیڑ برتگ وھدیکہ پوج ءِ تیرگواری ءَ یک مردمے بیران ءُ ھشت زدگ بوتگ انت –

گیشیں ھالانی رِد ءَ بلوچستان ءِ دمگ چاگی ءَ پاکستانی پوج ءِ کارمندانی تیرگواری ءَ ڈرائیور ءِ کوش ءِ بگیری ءَ زھرشانی کنوکیں مردماں نوکنڈی ءَ شال تاں تفتان ءِ شاھدگ آر سی ڈی بند کرتگ وھدیکہ زھرشانی کنوکاں ھمود ءِ پوج ءِ کارگس ءِ ڈوک جنگ بندات کتگ پسوی ءَ پوجی کارمنداں تیرگواری کتگ، ھالانی رِد ءَ تیرگواری ءَ چہ ءَ یک مردمے بیران ھشت زدگ بوتگ انت –

تیرگواری ءَ زدگ بوتگیں مردم دالبندین ءَ پرنس فھد نادراھجاہ سرکنگ بوتگ انت، کہ آھانی تہ ءَ چار ءِ جاور نگیگ انت ءُ دو زدگ بوتگیں مردم گیشیں الاج ءِ ھاتر ءَ شال ءَ برگ بوتگ انت –

زدگ بوتگیں مردمانی تہ ءَ دو ءَ لاپ ءَ تیر وارتگ کہ آھانی جاور سک نگیگ انت –

دالبندین ءَ پرنس فھد ءَ ساڑی ایں زدگ بوتگیں مردمانی رِد ءَ پاکستانی پوج ءَ آھانی سر ءَ کورکائی تیرگواری کتگ، اے وھد ءَ ھما مردمانی سر ءَ تیرگواری کنگ بوتگ کہ زھرشانی گون ھم نبوتگ انت –

زدگ بوتگیں مردمانی دمگی اھوالکاراں گوں تران کنان ءَ گوشتگ کہ آ وتی گِسانی دیما بوتگ انت کہ آھانی سر ءَ تیرگواری کنگ بوتگ –

چاگی ءِ اھوالکارانی رِد ءَ نوکنڈی ءَ پیک اپ گاڑی ءِ ڈرائیور کوش ءِ بگیری ءَ زھرشانی کنوکانی سر ءَ پوج ءِ تیرگواری ءَ زدگ بوتگیں مردمانی آرگے ھاتر ءَ بس یک ایمولینس ءِ بوتگ ھمے سوب ءَ گیشتر زدگ بوتگیں مردم لس مردمانی گاڑیانی سر ءَ دالبندین ءُ شال ءَ برگ بوتگ انت –