چہ تربت ءَ بیگواھیں ورناھانی دزگیری نصیر آباد ءَ پدر کنگ بیتگ

بلوچستان ءِ دمگ کیچ ءِ بنجاھی شھر تُربت ءَ پوج ءِ دست ءَ بیگواہ کنگ بوتگیں ورناھانی دزگیری سی ٹی ڈی پولیس ءَ نصیر آباد ءَ چہ پدر کتگ-

سی ٹی ڈی ءَ ٹاہ جتگ کہ چیریں ھالانی رسگ ءِ سرءَ سی ٹی ڈی ءَ بیڑبرتگ ءُ سے مردم گوں بمب ءُ شورواں دزگیر کُتگ اَنت-

سی ٹی ڈی ءَ سئیں ورناھانی پجّار حفیظ احمد ء وشدل، خلیل احمد ء وشدل جھمنند بلوچی بازار تربت ءُ کمالان ء محمد جان ءِ نام ءَ کتگ اَنت-

دمگی مردمانی رِد ءَ اشانی تہ ءَ خلیل احمد ء دلوش ءُ حفیظ احمد وشدل گوستگیں سال ءِ 24 دسمبر ءِ شپ ءَ آپسر ءَ آیانی لوگ ءَ چہ پوج دزگیری ءَ پد بیگواہ کتگ اَنت-

وھدے کہ کمالان ء محمد جان کیچ ءِ دمگ تگران ءِ نندوک اِنت کہ پوج ءَ 26 اگست ءَ آوار جتگ ءُ بیگواہ کتگ-

کھول رِد ءَ کمالان پوج ءَ وتی بُنجل ءَ لوٹائینتگ، بُنجل ءَ رسگ ءَ پد پوج ءَ آوار جتگ ءُ بیگواہ کتگ کہ چریشی ءَ پد آئی ءِ درگت ءَ ھچ وڑیں ھال نہ رستگ-

کھول رِد ءَ آ یک باپاری مردم اِنت کہ ایرانی تیل ءِ باپار ءَ بندوک بوتگ-

زانگ بہ بیت بلوچستان ءِ تہءَ بیگواھیں مردمانی دزگیری ءُ آیاں دروگیں میڑانی تہءَ کُشگ ءِ ٹاہ پیسر ءَ ھم سی ٹی ڈی ءَ من اِتگ اَنت-

گوستگیں روچ ءَ بیگواھیں نودربر حفیظ بلوچ بلوچستان ءِ دمگ نصیر ِآباد ءِ ھنکین ڈیرہ مراد جمالی ءَ سی ٹی ڈی ءِ دست ءَ دیم ءَ آرگ پد مجسٹریٹ ءِ دیم ءَ پیش کنگ بوتگ-

کاؤنٹر ٹیررزم ڈپارنمنٹ ءِ نیمگ ءَ چہ حفیظ بلوچ مجسٹریٹ دیم ءَ پیش کتگ ءُ آئی سرءَ گوں بی ایل اے ءَ سیادی ءِ بھتام جنگ بیتگ-

حفیظ بلوچ ءِ بگیری ءَ ایف آئی آر نبشتہ کُتگ- ایف آئی آر ءِ رِد ءَ سی ٹی ڈی ءَ بیڑبرتگ ءُ بی ایل اے ءَ سیادی داروکیں حفیظ ء حاجی محمد حسن باجوئی جھمنند ھُزدار جعفرآباد ءِ نزیک ءَ گوں تراکناکیں شورواں پُریں بیگ ءِ ھمراھی ءَ دزگیر کتگ ءُ سی ٹی ڈی ءَ تھانہ ءَ برتگ-