بیگواھیں نودربر حفیظ بلوچ زاھر کنگ بوتگ

نودربر حفیظ بلوچ نصیر آباد ءَ ڈیرہ مراد جمالی ءِ پولیس ءَ گون انت – کھول

بلوچ طلباء کونسل ءِ نیمگ ءَ شنگ کنگ بوتگیں درشان ءِ رِد ءَ ھمے سال ءَ ھزدار ءَ چہ زورانسری آوار جنگ بوتگیں قائداعظم یونیورسٹی ءِ نودربر حفیظ بلوچ زاھر کنگ بوتگ –

آئی ءِ کھول ءِ مردم ڈیرہ مراد جمالی پولیس تانہ ءَ گوں آئی ءَ دچار کپتگ انت – حفیظ بلوچ ءِ سنگتانی رِد ءَ پولیس ءَ حفیظ سر ءَ گیر سنجیدگیں کیس ءِ جتگ – بلے تنی وھدی ڈیرہ مراد جمالی ءِ پولیس واکدارانی نیمگ ءَ اے درگت ءَ ھچ وڈیں ھال شنگ کنگ نہ بوتگ –

زانگ بہ بیت حفیظ بلوچ ھمے سال ءِ ھشت فروری ءَ ھزدار ءََ چہ سَے سلاہ بندیں آوار جتگ ءُ گوں وت برتگ – آئی ءِ سنگتانی گوشگ انت کہ پاکستانی پوج ءِ میجر مرتضی گوشگ پد ءَ پوج ءِ کارمنداں زورانسری آوار جتگ –

حفیظ بلوچ ءِ زورانسری آوار جنی ءِ بگیری ءَ بلوچستان ءُ پنجاپ ءِ مزنیں شھراں زھرشانی برجاہ انت ءُ بلوچ کونسل اسلام آباد ءِ نیمگ ءَ اسلام آباد پریس کلب ءِ دیم ءَ زھرشانی بنجل ءِ ھم جوڈ کنگ بوتگ –

بلوچ کونسل اسلام آباد ءَ وتی درشان ءِ تہ ءَ گوشتگ کہ حفیظ بلوچ پولیس ءِ دست ءَ دیگ بوتگ بلے ما ھنگت آئی پہ وش ءُ سلامتی ءِ یل کنگے لوٹ ءَ کنیں تاں ھما وھد ءَ کہ آ یل کنگ نہ بیت