شھید شاهینہ ءِ نام ءَ – مھراب ازیز

نبشتانک: شھید شاهینہ ءِ نام ءَ

نبشتہ کار: مھراب ازیز

دی بلوچستان پوسٹ

چوناهی ءَ وَ سک دیر اِنت کہ پہ تو دو دانک نبشتہ کنگ لوٹ اِتگ بلے هردیں کہ نَد ءُ تاک دیم ءَ کُتگ اَنت گُڑا لبزانی امبار ءَ دُروہ اتگ پد ءَ یک مزنیں کارستے ءِ نام ءَ نبشتہ کنگ هم منی وڑیں نہ بزانتے ءِ وس ءَ ڈَن اِنت اے دویں دانکاں کہ پہ تو نبشتہ کنگ ءَ اوں اے پہ تئی کَد ءُ بالاد ءُ پہ تئی کِرد ءَ سک نِزور انت بلے مرچی دل ءَ نہ مرینت-

شاهینہ: مرچی ءَ چہ دو سال ءَ پیش من ترا اِنچو نزانتگ ءُ تئی کِردے بابت ءَ هِچ آشناهی نہ بوتگ آں بلے همے کہ تئی شهیدی ءِ نہ وشیں هال اِش کُت پد ءَ چار راه ءُ کِشکانی سرا پہ تو انساپ لوٹگ ءِ اوگام گوشاں کپت اَنت گُڑا من جھد کُت کہ ترا بِزاناں کہ شاهینہ کَے انت؟-

بگندے تو همے جیڑگ ءَ بہ ئے کہ دو سال ءَ پَد من چون تئی ترانگ ءَ کپتگ اَنت بلے تئی بابت ءَ جیڑگ هما روچ ءَ بندات کتگ کہ زالم ءُ زوراک ءَ ترا شھید کُتگ اَت-

شاهینہ: تو دلجم بُو کہ زالماں ایوک ءَ ترا شهید نہ کتگ بلکیں یک بلوچی لبزانکار ءُ یک جوانیں ازمکارے چہ بلوچ چاگرد ءَ پُلیتگ شاهینہ مئے چاگرد سک پد منتگ پد ءَ زالبول وَ دو همنچو پد منتگی ءِ آماچ اَنت انچو بگُش کہ بلوچ چاگردے تہ ءَ زالبولانی زندمان تهاری ءِ آماچ اِنت آهانی واهشت گُٹگیر کنگ بنت آهانی واب بے مانا کنگ بنت آهانی زندے وشی چہ آهاں پُلگ بنت- بلے تو همے پد مَنتگیں چاگردے زالبولانی واستا جهدے سکین ءِ بوتگ ئے تو همے زالبولانی تهاریں زندمان ءِ تہ ءَ یک رُژنائیں چراگے بوتگ ئے تو بلوچ زالبولاں اے باور کنائینتگ کہ هرکس ءَ وتی زندمان ءِ واهگانی سینگارگ ءِ هک ھست انت-

شاهینہ: لهتے مردم چہ وتی اُمر ءُ سَند ءَ گیش مزن بنت چیا کہ آهانی کِرد آهاں مزن کنت آهانی جد آهاں پدر کنت من هردیں کہ تئی جوڑ کرتگیں اکساں گنداں من همے ماراں کہ یک زالبولے ءِ سرجمیں چاگردے زوراکیانی دیم ءَ اوشتاتگ ءُ وتی زندمان ءِ واهگاں پیلو کنگ ءَ اِنت من هردیں کہ تئی شئیر ءُ لبزانکی کاراں گنداں گُڑا همے جیڑاں مرچی چونیں زیباهیں نبشتہ کار ءُ شائرے چہ بلوچی لبزانک ءَ پُلگ بوتگ بلے بہ بکش مئے لبزانکی مردم هم گُنگ انت کہ پہ تو انساپ بہ لوٹ اَنت مئے چاگرد تئی وڑیں کارستانی کَدر ءَ نزانت شاهینہ تو چو روچ ءَ گلزمین ءِ سرا وتی رُژن تالان کتگ ءُ تئی روتاب ءَ مرچی هزاراں بلوچ زالبول نشتگ انت-

شاهینہ مئے چاگردے یک مزنیں نِزوری ءِ اِیش انت کہ ما زوت بے ھیال بہ ایں ما زوت مردم ءَ چہ وتی مجگ ءَ کَشیں ءُ وتی همروچیگیں زند ءَ گوں دلگوش بہ ایں مرچی دو سال انت کہ تئی وڑیں یک ازمکار ءُ نبشتہ کارے اچ ما پُلگ بوتگ بلے روچ ءِ مروچی آئی ءِ کُشنده دزگیر کنگ نہ بوتگ اے گپ من ءَ سک بژنیگ ءُ پدرد کنت همے واستا ادا زوراک همک روچ شاهینہ ءِ وڑیں شیرزالاں شهید کن انت چیا کہ آ زاناں مارا کس جُست نہ کنت- بلے من ترا هال دیگ لوٹاں اچ تو پد تئی کاروان نہ اوشتاتگ تئی هما واب کہ پہ بلوچ چاگرد ءُ بلوچ زالبولاں تو دیستگ انت آ واب مرچی تئی گوهاروکاں وتی کوپگاں زرتگ انت هما واب کہ تو پشت گیتکگ انت آ واب مرچی تئی گوهاراں وتی چمانی تہ ءَ سینگار اتگ انت مرچی تئی جهدے برورد انت کہ هزاراں بلوچ زالبول ازمکاری ءِ پِڑ ءَ انت ءُ وتئلی واهگانی کلات ءَ سینگارگ ءَ انت من هردیں کہ تئی مات اما مھرنگ ءُ تئی گوهاراں گنداں گُڑا من جیڑاں کہ همے گپ باریں کئے ءَ گُشتگ کہ کسے ءَ اگاں برات نیست گڑا بزان آئی ءَ پُشپد نیست آ بے کس انت مرچی تئی گوهاراں اے گپ رَد کتگ ءُ پیشداشتگ کہ شاهینہ انگت زندگ انت شاهینہ ءِ گوهار آئی ءِ پُشپد انت ءُ شاهینہ ءِ هون ءَ هجبر پراموش نہ کن انت دانکہ تئی کُشنده ءَ پاهو ءَ سر نکن انت بے توار نہ بنت-

شاهینہ: تئی وڑیں ھستیانی چو ناهک ءَ شهید کنگ سک پدرد کنت چیا کہ لھتے مردم بس پہ وت ءَ زندگ بنت بلے لھتے مردم پہ وتی چاگرد ءَ پہ وتی راج ءَ زند گوازین انت تو هم پہ وتی راج ، زبان ءُ پہ وتی چاگرد ءَ زند گوازینتگ تئی وڑیں مردم پہ مِرگ گار نہ بنت بلکیں ابدمان بنت نمیران بنت بلے بژنے گپ ایش انت مئے چاگرد ءُ راج ءَ پہ تو انگت هچ نہ کتگ تئی کُشنده انگت دزگیر کنگ نہ بوتگ شاهینہ مارا پھل بکن تئی ارواه بھشت ءَ بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔