اکس: کمانچر بلوچ
نبشتانک: بلوچی چون دیمروئی کنت؟
نبشتہ کار: آئیشہ بلوچ
دی بلوچستان پوسٹ
بلوچ راج شری ءَ سرپد اِنت کہ زوگیر مئے شاھگانیں بلوچی زُبان ءِ ھلاسی ءَ لوٹ ایت چے ءَ دنیا ءِ دستور انت کہ اگاں تو یک راجے ھلاس کنگ لوٹ ئے گُڑا پیسر آئی ءِ زُبان، دود ءُ ربیدگاں لگتمال کنان ءَ ھلاس بہ کن چریشی ءَ راج ءِ تہ ءَ راجدوستی وت ھلاس بیت ءُ پد ءَ راج یک مجگی گلامے جوڑ بیت۔
بہ گِند ئے گُلامیں راج ءِ وشبھتی اِنت کہ راج ءِ تہ ءَ پہ بلوچ راجی زُبان ءِ دیمروئی ءَ بازیں زُبانزانت ءُ راجی زُبان ءِ جُھدکار ھست اَنت کہ آ شپ تاں روچ وتی دزھُورکی ءِ ھمُک ساھت ءُ دمان ءَ راج ءَ ھمے سرپدی دیان اَنت کہ تو بلوچے ئے، بلوچی تئی راجی پجّار اِنت ءُ بلوچی تئی ماتی زُبان اِنت پمیشکا بلوچی وانگ ءُ دربرگ پہ بلوچ ءَ سک آسان اِنت! بس مارا اشتاب بوگ نہ لوٹ ایت، ما تھنا بلوچی درونتاں وانان ءُ کم کم ءَ وتی راجی زُبان ءِ نبشتہ ھیل بہ کن ایں۔ گُڑا ماں اے جُھد ءَ چہ نودربراں اولی پسّو ھمے بیت کہ “من بلوچی نبیسّگ ءَ نزور آں، من نبشتہ ھیل نہ آں یا من بلوچی آبینکدار (کیبورڈ) ءَ ھیل نہ آں”-
بزاں اے وڑیں انچیں بے سیتیں نیمون ءُ گپاں کن اَنت کہ مئے وَ مجوری ھمیش اِنت پمیشکا نی من پْروش وارتگ۔ البت ما پہ اِے وڑیں نودربراں سرپدی دیگ لوٹ ایں کہ شُمئے وڑ ءَ پیسر ءَ ما ھم بلوچی نبشتہ ھیل نہ اِت ایں۔ ما ھچ کس ءَ ماں وانگجاھاں بلوچی نہ ونتگ ءُ ناں کہ ما بلوچاں ماں وانگجاھاں مئے جِند ءِ راجی زُبان وانینگ بیت چے ءَ کہ مئے بدواھیں دُژمن مئے سرجمیں بلوچ ءُ مئے شاھگانیں زُبان ءِ ھلاسی ءَ لوٹ ایت پمیشکا ما ایردستیں راج وتی راجی زُبان ءَ وتی دزھُورکی ءِ وھد ءَ وت وانگ ءُ دربرگ ءَ ایں، بلکیں راج ءَ ھم وانینگ ءَ ایں۔ شمئے ڈول ءَ ما ھم پیش ءَ راجی زُبان ءِ وانگ ءُ نبشتہ نزور اِت ایں بلے ما وتی جُھد برجاہ داشتگ ءُ وتی راجی زُبان یکشل ءَ وانان ءَ دربُرتگ۔ البت اگاں کسے بلوچی وانگ ءُ نبیسّگ ءَ ھیل نہ اِنت گُڑا ایشی ءِ متلب اے وَ نہ اِنت کہ آ دلپْروش بہ بیت یا وتی راجی زُبان ءَ ھیل مہ کنت بلکیں آئی ءِ اولی راجی زمہ واری وَ ھمیش اِنت کہ آ کم کم ءَ بلوچی درونتاں وت بِوان ایت ءُ پیسر بلوچی وانگ ءَ ھیل بہ کنت۔ وھدیکہ کہ تو بلوچی درونت سرجمی ءَ ونتگ اَنت گُڑا تو بلوچی نبشتانک ءُ آزمانکاں بہ وان ئے، دلگوش بہ کن کہ ھرچیزے تو وانگ ءَ بہ ئے گُڑا آئی ءِ ردیاں ھم چاران کن ئے، چی ءَ کہ مارا چہ وتی ردیاں دربرگ لوٹ ایت، بزاں ما بلوچ راج ءَ وت ماں وت وانگی اِنت انچوشکہ انگریزی ءَ “Self Study” گْوش اَنت ئِے چی ءَ کہ مئے راجی زُبان ءَ دگہ ھچ وانگجاہ ءُ آسراتی نیست انت۔ اگاں تو وانان بہ ئے گُڑا ترا سرپدی ھم رس ایت ءُ تو کم کم ءَ وت نبشتہ ھیل کن ئے۔ ما نہ گْوش ایں کہ تو یکپارگی نبیسّگ ءَ بندات بہ کن ئے ءُ یک روچ ءِ تہ ءَ مُلایے جوڑ بِہ بَہ ئے بلکیں تو ھر روچ درونتاں وانان ءُ نبشتہ ھیل بہ کن گُڑا تو وت دربر ئے۔ باید اِنت تو نبیسّگ ءِ وھد ءَ اشتاپ مہ بہ ئے بلکیں کم کم ءَ نبیسّان کن، ھر وڑیں گالرِدے نبیسّ ئے گُڑا تو وتی ھمُک گالرِد ءَ دو سے رَند ءَ وت چمشانک دیان ءَ راست بہ کن، اگاں تو وتی ردیاں وت راست کنان بَہ ئے گُڑا دربر ئے۔ ھمے ڈول ءَ مارا وتی ونتگیں درونت ھم یات بنت۔ اگاں ما وٹسیپ ءُ پیسبُک ءَ راج ءَ ھم وانین ایں گُڑا راجی زُبان ھم دیمروئی کنت ءُ پد ءَ ما وت وتی راجی زُبان ءَ ھم زبر بَہ ایں۔ وھدے کہ ما راجی زُبان دربُرتگ گُڑا ما اوشت ءِ آماچ مہ بہ ایں بلکیں راج ءَ بِہ وانین ایں ءُ راجی زُبان ھما وھد ءَ دیمروئی کنت وھدے کہ ما وانین ایں۔
بلوچ نودربری گل (بی ایس او) ءِ کارسر ءُ نودربر باید انت کالج ءُ یونیورسٹیاں بلوچاں نودربراں بلوچی وٹس ایپی وانگجاھانی اڈ کنگ ءِ سرسوج بہ کن اَنت۔ بلوچ راج ءِ نودربر پیسبُکی ءُ وٹس ایپی وانگجاھاں پہ راجی زُبان ءِ دیمروئی ءَ کارمرز بہ کن اَنت۔ امیت انت کہ شُمارا چہ اِے نبشتانک ءَ بازیں سرپدی یے رستگ، شُما زیت راجی زُبان ءَ وانان دربر اِت ءُ پہ راجی زُبان ءِ دیمروئی ءَ شُما زُبان ءِ ھزمتکار ءُ جُھدکار جوڑ بَہ اِت۔
بلوچ راج شالا تپاک ءُ یکمُشت بہ بات، بلوچستان شالا آجو بہ بات، بلوچی شالا دیمروئی بہ کنات ءُ پہ راجی زُبان ءِ دیمروئی ءَ مُدام جُنزان بات اِت۔ شالا انچوش بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔