وائس فار بلوچ مسنگ پرسنز ءِ چیئرمین نصراللہ بلوچ ءَ بلوچستان ءَ بیگواہ بیتگیں نودربرانی ھاترءَ اسلام آباد ءَ پُر ایمنیں زھرشانی کنوکیں بلوچ نودربر، انسانی ھقانی ءُ چاگردی باسک ایمان مزاری ایڈوکیٹ ءُ ایم این اَے محسن داوڑ ءَ ھوار دگہ سول سوسائٹی ءِ مردمانی سرءَ پولیس ءِ نیمگ ءَ تاگت ءِ کارمرز کنگ ءُ آیانی بگیرءَ ارزی نبشتہ کنگ اپسوزی گپ ءِ نامینتگ ءَ گُشتگ کہ پولیس ءِ اے زوراکیں روش مردمانی تُرس آماچ کنگ ءُ بیم کنگ ءَ ھور ھور لیکھی آجوئی ءِ سرءَ بندش جنگ اِنت کہ اِشی ءَ ایر جنیں۔
آئی ءَ گُشتگ کہ ریاست ءَ سرپد بیگ لوٹیت کہ چُشیں پندلاں چہ پر ایمنیں توار بند کنگ ءَ چہ مھلوک وتی پھازگی ءِ درگت ءَ بے باوری ءِ آماچ بنت ءُ اِشی سوبءَ چاگرد ھراب کاری ءِ نیمگ ءَ رؤت کہ ڈیھہ ءَ جوانیں گپ ءِ نہ اِنت پمیشکہ واکداراں زانشتی پیسلہ کنگی اَنت ءُ پر ایمنیں تواراں سرکار ءَ ایش کنگ لوٹیت ءُ ملکی رھبند ءَ ردءَ مردمانی کمک کنگ لوٹیت۔
نصراللہ بلوچ ءَ اسلام آباد مزن آمید گِس ءِ چیف جسٹس اطھر من اللہ ءِ نیمگ ءَ بلوچ نودربرانی ءُ ایمان مزاری ءَ ھوار دگہ مردمانی ھلاپ واکدارانی نیمگ ءَ تاگت ءِ کارمرز کنگ ءُ آیانی بگیری ءَ بغاوت ءِ ارزی لس مھلوک ءِ بُنکی ھقانی ھلاپ ورزی نامینتگ ءُ پولیس ءَ پرمان داتگ کہ ایمان مزاری بلوچ نودربر ءُ ایندگہ مردمانی دزگیری دارگ بہ بنت، اَے یک جوانیں گامگیج ءِ نامینتگ ءُ گُشتگ آمید گِس ءِ نیمگ ءَ مردمانی بُنکی ھقانی پھازگ ءُ ریاست ءِ نیمگ ءَ چِست کنگ بیتگیں گیر قانودی گامگیجانی ایرجنگ ءَ چہ مھلوکءِ آمید گسانی سرءَ باور ودی بیت۔
نصر اللہ بلوچ اے واھگ ھم درشان اِتگ کہ اسلام آباد مزن آمید گِس بلوچ نودربراں ھوار دگہ مردمانی سرءَ نبشتگیں ایف آئی آراں ھلاس کنگ ءُ بلوچ نودربرانی پھازگی ءَ باوری کنگ ءَ ھوار ھوار بیگواھیں بلوچ نودربرانی یل کنگ ءَ ھم کرد پیلو کنت۔