راج ءِ زندگ دارگے ھاتر ءَ زبان ءِ زندگ دارگ اژدری اِنت – بی ایس او آزاد

بلوچ نودبر گل آزات ءِ بنجاھی جارکش ءَ رسانکدراں ماتی زبانانی میان استمانی روچ ءِ درگت ءَ وتی درشان ءِ تہ ءَ گُشتگ کہ تا ھما وھد کہ یک راجے وتی زبان ءَ پھاز ات کت مہ کنت، گڑا بزانکہ آ وتی راجی پجار ءَ رکینت کت نہ کنت-

جارکش ءَ گوشتگ کہ پہ ایردستیں راجاں وتی زبانءِ رکینگ گیشتر اژدری اِنت، پرچاکہ کہ زورآور مدام ایردستانی زبانانی گار ءُ گمسار کنگ ءِ جہد ءَ کنت – اَنچو کہ پاکستان ءَ بنگلادیش ءَ گوں بنگلالی زبان ءَ کُتگ، مروچی ھمے پیم پاکستان گوں بلوچ ءِ زباناں کنگ ءَ اِنت- بلئے بنگالی آں ءَ اے سما بوتگ کہ وتی راجی زبان ءِ پہازگ چینکس اژدری اِنت ءُ زبان ءِ واستا جھد ءَ آھاں راجی آجوئی ءِ جہد ءِ سما داتگ ءُ مروچی آیاں وتی زبانءَ ھوار وتی راجی پجار ھم رکینتگ ءُ یک آزاتیں استانےءِ بستار ءَ دنیا ءِ تہءَ زندگ انت-

جارکش ءَ دیمتر ءَ گُشتگ کہ یک نیمگے بلوچ راج ءِ مردماں زورآوریں لشکر آوار جنگ ءُ بیگواہ کنگ ءَ اِنت ءُ دومی نیمگ ءَ بلوچ راجی پجار ءِ ھلاس کنگ ءِ ھاتر ءَ اردو ءُ ایندگہ زوراکیں استانانی زباناں مارا وانینگ ءَ اِنت۔

آئی ءَ گوشتگ کہ یک بلوچ زھگے ءَ بلوچ ءِ زبانانی بدل ءَ وانگجاہانی تہ ءَ اردو ءُ چائینز وانینگ بیت، اے پالیسی استان ءَ ھمے واستا جوڑ کُتگ کہ بلوچ وتی زبان ءُ پجار ءَ گار بہ کن انت – چوشکہ بلوچی کتابانی سرا بندش جنگ ھم ھمے پالیسی ءِ بھرے – وتی ماتی زبان بلوچی، براہوئی ءُ ایدگہ زبان آنی رکینگ بلوچ راجی آجوئی ءِ جہد ءِ بھر اِنت، ما پہ وتی زبان ءِ رکینگ ءِ ھاترا وتی جھد ءَ گیش ءَ چہ گیش بکن ایں-

بی ایس او آزاد بنجاھی جارکش ءَ وتی درشان ءِ گڈسر ءَ ھمے گوشتگ کہ بلوچ ورنا اے پڑ ءَ وتی جھدءَ گیش ءَ چہ گیش بکن اَنت ءُ وتی زباناں نبشتہ کنگ ءُ گپ کنگ ءِ جھد ءَ بکن اَنت – اے یک تچکیں راستی یے کہ تاں وھد ءَ ما ایر دستیں مئے ماتی زبان مدام ھترہ ءِ تہ ءَ بنت پمیشکہ مارا لوٹیت کہ آجوئی ءِ جھدءَ ھوار وتی ماتی زبانانی رکینگ ءِ جہد ءَ ھم گیش بکن ایں –