دی بلوچستان پوسٹ پتر ھال ءَ سر بیتگیں ھالانی رد ءَ چہ شال ءَ لشکریاں سرپرہ ٹک ءَ سیادی داروکیں دگہ دو کسان سالیں ورناہ دزگیری ءَ پد بیگواہ کُتگ اَنت۔
اھوالانی رد ءَ گوستگیں شپ ءَ پاکستانی پھازگی لشکریاں شال ءَ فیض آباد میتگ ءَ حاجی نور اللہ سرپرہ ءِ لوگ ءِ سر ءَ بیڑ بُرتگ ءُ آئی ءِ زھگ سعود سرپرہ کہ دھمی مکتب ءِ نودربر اِنت آئی ءَ ھوار سدیس ء حاجی نثار سرپرہ کہ یازدھمی ءَ وانگ ءَ اِنت دزگیر کنگ ءَ پد بیگواہ کُتگ اَنت۔
زانگ بہ بیت کہ 7 فروری ءَ ھم لشکریاں حاجی نور اللہ سرپرہ ءِ لوگ ءِ سر ءَ بیڑ بُرتگ ءُ آئی ءِ یک زھگے فرھاد سرپرہ ءُ حاجی نثار سرپرہ ءِ زھگ ثاقب سرپرہ دزگیری ءَ پد گوں وت بُرتگ اِت اَنت وھدیکہ چریشی ءَ یک روچے پیسر 6 فروری ءَ لشکریاں حاجی نثار ءِ لوگ ءَ چہ آئی ءِ دگہ یک زھگے ھارون ء حاجی نثار سرپرہ ھم آوار جتگ اَت کہ داں انگت بیگواہ اِنت۔
ھمے ھپتگ ءَ اے کھول ءِ پنچ ورنائیں مردم لشکریاں دزگیر کنگ ءَ پد زورانسری بیگواھی ءِ آماچ کُتگ اَنت وھدیکہ لھتیں ماھانی تہ ءَ سرپرہ ٹک ءِ 12 مردم پھازگی لشکریانی دست ءَ زورانسری بیگواہ کنگ بیتگ اَنت۔
چریشی ءَ پیسر زورانسری بیگواھی ءِ آماچ بیتگیں مردمانی تہ ءَ ذاکر سرپرہ، جاوید سرپرہ، راشد سرپرہ، فیاض سرپرہ، ایوب سرپرہ ءُ صادق سرپرہ ھوار اَنت کہ اے جتاھیں وھداں لشکریاں دزگیر کنگ ءَ پد بیگواہ کُتگ اَنت۔
ھمے ماہ ءِ تہ ءَ سرجمیں بلوچستان ءَ مردمانی زورانسری بیگواھیانی وئیلانی تہ ءَ اناگتی گیشی ءِ گندگ ءَ پیداک اِنت کہ بلوچستان ءِ جتاجتائیں دمگاں لشکری مردماں بیگواہ کنگ ءَ پد ناشناسیں ھنداں برگ ءَ اَنت۔ داں انگت بلوچستان ءِجتا جتائیں ھند ءُ دمگاں چہ زورانسری بیگواھیانی امانت بیتگیں کساس پنجاہ مردمانی پجار بیتگ۔
بلوچستان ءِ سیاسی چاگردی ءُ انسانی حقانی گل ءُ باسکانی گُشگ اِنت کہ اَے بیگواھیانی درچ ترسناکیں گامگیج اِنت آیاں گُشتگ کہ لشکری نوشکی ءُ پنجگور وئیل ءَ پد وتی زھراں لس مھلوک ءِ سرءَ کشگ ءَ اِنت۔ وائس فار بلوچ مسنگ پرسنز ءِ وائس چئرمین ماما قدیر بلوچ ءَ گُشتگ کہ سرجمیں جھان ءَ انسانی حقانی پھازگ ءِ ھاترءَ کوکار کنوکیں پاکستانی حاکم بلوچستان ءَ انسانی ھکانی سلتریں لگتمالیانی تہ ءَ ھوار اَنت۔