متحدہ عرب امارات ءَ بلوچستان ءِ جھمنندیں مردمے ھمودے چیریں ادارگاں دزگیر کنگ ءَ پد ناشناسیں جاھاں بُرتگ۔
زورانسری بیگواھی ءِ آماچ بیتگیں مردم ءِ پجار عبدالحفیظ زہری ءِ نام ءَ بیتگ۔
ٹی بی پی ءَ رس اتگیں اھوالانی رد ءَ بلوچستان ءِ دمگ خضدار ءَ نندوکیں شھید حاجی محمد رمضان زہری ءِ زھگ ءُ شھید مجید ءُ شھید حئی ءِ مستریں برات عبدالحفیظ زہری متحدہ عرب امارات ءِ چیریں ادارگاں آئی ءِ لوگ ءَ انٹرنیشنل سٹی چہ دبئی ءَ گوستگیں شپ ءَ ادار دو ءَ بیگواہ کُتگ ءُ گوں وت بُرتگ چریشی ءَ پد آئی ءِ ھچ پئیمیں اھوال نہ رس اِتگ۔
زانگ بہ بیت حفیظ زہری ءِ برات مجید بلوچ بلوچستان ءِ دمگ خضدار ءَ زورانسری بیگواھی ءَ پد 24 اکتوبر 2010 ءَ آئی ءِ ژانگولیں جون دزکپتگ اَت وھدیکہ حفیظ زہری ءِ پِت ناموریں باپاری مردم حاجی رمضان زہری 2 فروری 2012 ءَ سلاہ بندیں مردمانی تیر گواری کُتگ ءُ بیران کُتگ اَت۔
ھندی اھوالانی رد ءَ دویں وئیلانی تہ ءَ پاکستانی چیریں ادارگانی ءُ سرکاری چیردستی ءَ کارکنوکیں سلاہ بندیں ٹولی ھوار بیتگ اَنت۔
چریشی ءَ پیسر عبدالحفیظ زہری ءِ ناکوزتک انسانی اگبالانی باسک راشد حسین 26 دسمبر 2018 ءَ متحدہ عرب امارات ءِ چیریں ادارگاں بیگواہ کُتگ ءُ شش ماہ ءَ داں وتی کِر ءَ دارگ ءَ پد راشد حسین ابید قانودی پئیماں پاکستان ءِ دست ءَ داتگ کہ داں انگت بیگواہ اِنت۔
راشد حسین بلوچ ءِ دزگیر کنگ ءَ پد متحدہ عرب امارات ءِ پولیس ءُ چیریں ادارگانی کارمنداں حفیظ زہری ءِ لوگ ءَ بیڑ بُرتگ اَت وھدیکہ کھول ءِ رد ءَ کارمنداں راشد حسین ءِ پاسپورٹ ءِ زیرگ ءِ ھاتر ءَ بیڑ بُرتگ اَت۔
زانگ بہ بیت راشد حسین ءِ کھول ءِ رد ءَ آھانی کر ءَ راشد حسین ءِ گیر قانودی پئیم ءَ پاکستان دیم دیگ ءِ نبشتھی منانک ھست اَنت۔ وھدیکہ کھول ءِ نیمگ ءَ شال، کراچی ءُ اسلام آباد ءَ زھرشانی کنگ بیتگ اَنت۔
عبدالحفیظ زہری ءِ زورانسری بیگواھی ءِ درگت ءَ داں انگت متحدہ عرب امارات سرکار ءِ نیمگ ءَ ھچ پئیمیں لیکہ دیم ءَ نیتکگ اَنت-