سندھ ءِ مزن شھر کراچی ءَ وائس پار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ پنچ سد ءُ چِل ءُ نھ روچ سرجم بوتگ – پنجگور ءَ چہ سیاسی ءُ چاگردی باسک ھاجی عبدالشکور بلوچ، عمران بلوچ ءُ رسول بخش بلوچ ءَ بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اتگ –
ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ دنیا ءِ گوستانک ءَ ھما مردم یات کنگ بنت کہ آھاں وتی ننگ ءُ ناموس ءِ پھازگ ءُ سرڈگار ءِ پھازگ ءِ ھاتر ءَ مدامی سامراجی تاکتاں گوں پُرایمنیں جھد کتگ – ھما راج کہ آھانی نام ءُ نشان گار بہ انت کہ آھاں سامراجیانی گلامی منّ اِتگ وھدیکہ ایردستیں راج گلامی نہ منّ انت گڑا اے امل ءَ سامراجی تاکت وتی مرگ سرپد بنت ءُ پد ءَ آ ایردستیں راجانی جھد ءِ لپاشگ ءَ وتی درسیں تاکت ءَ کارمرز کن انت راج ءِ گیش ءَ چہ گیش بھر زورگ ءُ جھد ءِ دیمرؤئی گندگ ءَ زالم وتی زوراکیانی سرجمیں سیمسراں سرگڑ کنت سامراجی تاکتانی زلم ءُ زوراکیاں چہ جھد ءِ تہ ءَ گیشتری کیت پرچاکہ راجی جُھد سامراجی زوراکیاں چہ بےسوب بوگ ءِ بدل ءَ گیشتر مھکم تر بنت –
ماما قدیر بلوچ ءِ گوشگ ات کہ سامراج ءِ پیداک کتگیں ریاست ءَ بلوچ ڈیھے پھازگ ءِ ھاتر ءَ کمربستہ بوتگ بلے بلوچان چہ بندات ءَ گلامی نہ منّ اِتگ ءُ وتی زندگیں راج ءِ سبوت داتگ پاکستان ءَ وتی زورگیری اولی روچ ءَ بگر تاں روچ مروچی مدامی جنگی کانود لگتمال کتگ انت لس مھلوکانی سر ءَ اُرش کنگ ءَ بگر چُک ءُ زالبولاں لٹ شاپ کنگے پاکستان ءِ وتی تاریخ ءِ پاکستان ءَ ھر وھد ءَ بلوچ زالبول وتی زوراکیانی نشانگ جوڈ کتگ انت ھپتاد ءِ دھک ءَ کوھلو ءُ کاھان ءَ سدانی کچ ءَ چُک زالبول شھید کتگ انت سدانی کچ ءَ آوار جتگ ءُ بیگواہ کتگ انت ءُ وتی زندانانی تہ ءَ بلوچ زالبولانی سر ءَ لٹ شاپی روچ مروچی یکشل ءَ برجاہ انت –
ماما قدیر بلوچ ءِ گوشگ ات کہ شپ ءِ تہاری ءَ اے چادر ءُ چاردیوالی لگتمال کن انت لوگانی تہ ءَ دور کن انت مردماں شھید کن انت یا گون وت بر انت اھانی جن ءُ چک ماتاں لٹ کٹ کن انت – باز براں مردیناں ھوار آھانی چُک ءُ جنیناں ھم گوں وت بر انت کوھلو کاھان ءَ بلوچ زالبول زرینہ مری سال دوھزار شش ءَ آوار جنگ بوتگ کہ ھنگت بیگواہ انت – مشکے ءَ لشکر کشی ءِ میان ءَ لس مھلوک ءِ سر ءَ شیلنگ کنگ بوتگ چُک زالبول شھید کنگ بوتگ انت –