برانز بلوچ
دی بلوچستان پوسٹ
تو ھیال ءِ زینت ءِ منی
دید ءِ زیبائے دروشم ءِ
مہر ءِ حکیں وارثے
ھیال ءِ جُہلگیں زِرے
وپا ءُ دین ءِ …
نیکیں چاپڑے سیاھگ ءِ منی
شعیب ءُ حامد جان ءِ منی
کچکول بہار ءِ توار ءِ منی
زِر پہاز ایں کمانڈ ءِ پگر ءِ ….
شہیدانی بچکند ءِ منی
اسلم ءِ تَچک ایں کِشک ءِ
سَر بُلند ءِ دروشم ءِ
یاسمین ءُ اِزگل ءِ ….
نوتک ءِ شعرانی گال
کمبر ءِ سیاسی سَنچ
بالاچ ءُ غلام ءِ گلزمین
آفتاب ءُ شاہ داد ءِ
راستی ءِ ڈَس ءُ شان ءِ منی
کِشک ءُ پَند ءِ منی
پَری تَب ایں واب ءِ منی …
مہر ءِ چیدگ ءِ منی
حق نواز ءُ پُلیں امیر ءِ
فدا ءُ الیاس نزر جان ءِ منی
روچ ءِ سد رندا مَرگ ءَ امباز باں
بولان ءِ توکلیں زید ءِ
کلبر ءِ بہاری نوبتاں ….
تو شال ءِ منی
زانت ءِ مکتب ءِ منی
چابہار ءُ گُلیں بلیدہ ۓ منی
آواران ءُ مشکے ۓ منی
مہروان ایں مادر ءِ منی
مہر ءِ مسیت ءُ ذَگرانہ منی
مادریں بلوچستان ءِ منی
مادریں بلوچستان ءِ منی
روچ ءِ سد رندا سجدہ کنا آک ءَ تئی
برانز بلوچ