ٹی بی پی اھوال
بلوچستان ءِ تیاب دپی شھر گوادر ءَ مروچی پانزدہ روچ سرجم اِنت کہ لس مھلوک زھرشانی کنگ ءَ اَنت، زھرشانی کنوکانی سروکی ءَ گوادر ءِ تیابدپ ءَ رُستگیں مولانا ھدایت الرحمن کنگ ءَ اِنت کہ آئی ءِ جند وت ھم یک دریاوردیں لوگے ءَ چہ سیادی داریت۔
مولانا ھدایت الرحمن ءِ ھمرائی ءَ گوادر ءِ مردین، جنین، زھگ، ورناہ، کماش، زند ءِ جتا جتائیں تکاں سیادی داروکیں مردم ھوار اَنت۔ مولانا ھدایت الرحمن ءِ راجکاری سیادی جماعت اسلامی ءَ اِنت بلے اے نندانک، اے زھرشانی کہ گوستگیں دو ھپتگاں چہ برجاہ اِنت اے زھرشانی “گوادر حق دو تحریک” ءِ نام ءَ ابید ءِ کجام ھم سیاسی گل ءِ سروکی ءَ پہ لس مھلوک ءِ لوٹانی ھاتر ءَ بندات کنگ بیتگ۔ وھدے اے زھرشانی نندانک بندات بیتگ اَت گُڑا چہ واکدارانی نیمگ ءَ ھمے ٹاہ دیگ بیتگ اَت کہ لھتے مردم اَنت ءُ زوت دم بر اَنت، بلے مولانا ھدایت الرحمن ءِ، سروکی ءَ جنزوکیں نندانک ءَ ھمک روچ مردمانی کساس ودان اِنت۔
گوادر حق دو تحریک ءِ جار ءِ پد ءَ مروچی گوادر ءِ دگانی سر ءَ بلوچ جنین آدماں زھرشانی روانکے کش اِتگ، کہ اِشی ءِ تہ ءَ ھندی اھوالانی رد ءَ ھزارانی کساس ءَ زالبول ھوار اَنت۔ گوادر ءُ بلوچستان ءَ سیادی داروکیں اھوالکارانی رد ءَ گوادر ءِ راجدپتر ءِ اے زالبوالانی مستریں زھرشانی روانک اِنت۔
مولانا پرچا زھرشانی کنگ ءَ اِنت ءُ پرچہ لس مردم مولانا ءِ گپانی سر ءَ دگانی سر ءَ درکپگ اَنت ءُ زھرشانی کنگ ءَ اَنت۔ اے درگت ءَ گوں ٹی بی پی ءَ زھرشانی کنوکیں زالبولے ءَ وتی نام پدر نہ کنگ ءِ شرت ءَ پد گشت کہ “ما گوادر ءِ جھمنند سک بزگ اِنت، مئے شھر ءِ وانندہ، جھدکار، چاگردی ءُ سیاسی باسک بیگواہ کنگ بیتگ اَنت، کُشگ بیتگ اَنت۔ مھلوک ءِ تہ ءَ تُرس ءِ ودی کنگ بیتگ، بازیں سالاں چہ دریا وردانی ھمک روچ کم شرپ بندات اِنت، مئے برات کہ سیمسراں کار کنگ ءَ اَنت آیانی سر ءَ تیر گواری، آیانی کم شرپ کنگ، سیمسر ءِ بند کنگ، ٹوکن ءِ نام ءَ بھتہ مافیہ ءِ لُٹ ءُ پُل چوں روچ ءَ پدر اَنت۔”
کمو ھاموشی ءَ پد آئی ءَ زھرشانی ءَ ھواریں زالبولانی نیمگ ءَ دست شاھار دات ءُ گشت “اے زالبول پہ دگہ کَس ءَ در نہ کپتگ اَنت اے پہ وتی سرڈگار، پہ وتی تیاب، پہ وتی روزگار، پہ وتی ازت ءُ ننگ ءَ درکپتگ اَنت۔” آئی ءَ گشت ما زانیں لھتے مردم گشگ ءَ اَنت کہ “مولانا چوں پہ زالبولاں توار چِست کُت بلے آمردم زاناں مئے جاورھالاں سرپد نہ اَنت ؟ مئے زند کجام بزگی ءُ واریانی تہ ءَ گوزگ ءَ اِنت۔”
گوادر حق دو تحریک ءِ نندانک ءَ چہ سرکار ءِ نیمگ ءَ ظھور بلیدی گوں دگہ وزیراں اتکگ بیتگ، بلے داں انگت گندگ ءَ مولانا ءِ درستیں لوٹ سرجم کنگ نہ بیتگ اَنت۔
زانگ بہ بیت گوادر ءِ تہ ءَ جُنزوکیں اے نندانک گوادر ءِ مستریں نندانک گشگ بیگ ءَ اِنت، ءُ انچیں ھال ھم دیم ءَ پیداک اَنت کہ چہ اے نندانک ءِ سبب ءَ سی پیک سر ءَ سان کپگ ءَ اِنت ءُ چینی واکداراں چہ پاکستان ءَ اے زھرشانی ءِ آسر کنائینگ ءِ درگت ءَ زور پِرداتگ۔
داں مروچی سربیتگیں ھال ءَ چہ سرکار ءُ واکدارانی نیمگ ءَ ھچ پیمیں چُشیں گام زیرگ نہ بیتگ کہ چہ آ گاماں زانگ بہ بیت کہ واکدار گوادر حق دو تحریک ءُ مولانا ھدایت الرحمن ءِ لوٹانی پیلو کنگ ءِ ھاتر ءَ دلگوشی ءَ گوں جھد کنگ ءَ اَنت۔