سعید بلوچ ءِ بیگواھی ءِ ھلاپ ءَ شال ءُ کراچی ءِ دگ ءِ سر ءَ نندانک ءِ جار ءَ جن ایں – کھول

مستونگ ءِ جھمنند بیگواھیں سعید احمد ءِ گْھار فریدہ بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ برات ءِ دراجیں وھدے ءِ بیگواھی ءَ یل کنائینگ ءِ ھاتر ءَ پشمبے روچ ءَ شال کراچی شھدگ ءِ سرءَ زھرشانی نندانک کن ایں-

آھاں گوشتگ کہ زروانسری آوار جنی یک بے راھبندی ءُ بے انسانی کرد اِنت، 29 اگست 2013 ءَ منی برات سعید احمد مستونگ لدھا ءِ نزیک ءَ چہ پاکستانی پوج ءِ کارندھاں آوار جتگ ءُ بیگواہ کتگ ما سعید احمد ءِ یل کنائینگ ءِ ھاتر ءَ ھک ءُ انساپ ءِ سرجمیں در ٹُکّ اِتگ اَنت بلے ھچ جاگہ انساپ نہ رستگ –

سعید احمد ءِ گھار فریدہ بلوچ ءِ گوشگ اِنت کہ ما انساپ ءِ ھاتر ءَ آمید گساں شتگ ایں بلے اود ءَ ھم مارا بے اُمیت کتگ ئے ما سعید احمد ءِ یل کنائینگ ءِ ھاتر ءَ مستونگ شال ءُ اسلام آباد ءَ زھرشانی کتگ بلے اود ءَ دروگیں تسلہ داتگ-

فریدہ بلوچ ءَ دیمتر ءَ گوشتگ کہ ما پیسلہ کتگ پشمبے ءِ روچ ءَ 18 نومبر 2021 ءَ ما شال کراچی شھدگ ءَ بند کن ایں ءُ داں سعید احمد ءِ یل کنگ نہ بیت ما ھمکروچ ھمے وڑ دگاں بند کن ایں-

فریدہ بلوچ ءَ گُڈ سرءَ گْوشتگ کہ ما انسانیت ءِ ھاتر ءَ سرجمیں مردماں گوں دزبندی کن ایں آ اے زھرشانی ءَ مئے ھمراھداری بہ کن اَنت-