بیگوائیں نودربر رھشون شبیر بلوچ ءِ گوھار سیما بلوچ ءَ وتی چاگردی رسانکدر ءِ تند جاہ ٹوئیٹر ءَ شنگ کُتگیں تامری کلوہ ءِ تہ ءَ گُشتگ کہ چار اکتوبر دوھزار ءُ شانزدہ ءَ بگر داں انی پنچ سال بیت کہ منی برات بیگواہ اِنت، بلے منی برات ءِ درگت ءَ ھچ وڑیں اھوال نیست کہ آ کجا اِنت چونیں جاورانی تہ ءَ اِنت۔
سیما بلوچ ءَ گُشتگ کہ اے پنچ سالانی تہ ءَ من ھمک وھد جھد کُتگ وتی برات ءِ یل کنائینگ ءِ ھاتر ءَ بلے منی برات یل کنگ نہ بیتگ ءُ داں انگت من ءَ اَے گُشگ نہ بیگ ءَ اِنت کہ آ کجا اِنت کجام جاورانی تہ ءَ اِنت۔
سیما بلوچ ءَ شبیر بلوچ ءِ بیگوائی ءَ پنچ سال ءِ سرجم بئیگ ءِ روچ ءَ بزاں چار اکتوبر دوھزار ءُ بیست ءُ یک ءَ کراچی پریس کلب ءِ دیم ءَ روچ ءِ سئے بج ءَ زھرشانی ءِ جار جنان ءَ چہ زند ءِ جتائیں تکاں سیادی داروکیں مردماں چہ دزبندی کُتگ کہ آئی ءِ ھمراھداری بہ کن اَنت ءُ زھرشانی ءَ بھر بہ زیر اَنت۔
زانگ بہ بیت شبیر بلوچ بی ایس او آزاد ءِ گوستگیں بنجاھی انفارمیشن سیکریٹری اِنت کہ چار اکتوبر سال دوھزار ءُ شانزدہ ءَ آئی ءِ لوگ بانک ءِ دیم ءَ بیگواہ کنگ بیتگ اَت ءُ داں انگت بیگواہ اِنت۔