بلوچ یکجھتی کمیٹی ءَ وتی شنگ کرتگیں یک درشانے ءِ تہ ءَ گشتگ کہ گوستگیں شپ ءَ پُر ایمنین نودربرانی سر ءَ پولیس ءِ لَٹ ءُ کُٹ، دزگیری، دروگیں ارزی نبشتگ کنگ ءَ ترندی ءَ ایرجتگ ءَ گوشتگ کہ بلوچستان ءَ نِی نودربراں پُر ایمنیں زھرشانی کنگ ءِ ھک ھم دیگ بیگ ءَ نہ اِنت چُشکہ پاکستان ءِ آئین ءِ ھلاپ ورزی ءُ سرکار ء بلوچستان ءِ لَٹ گرنمچمانیں مازگانی پیشدراھی ءَ کنت، بلوچستان ءِ نودربر بازیں وھدے ءَ اے وڑیں لَٹ ءُ کُٹانی دیمپانی ءَ کنگ ءَ اَنت وھدیکہ نودربر جائزیں لوٹانی واستا زھرشانی ءِ راہ ءَ گچین کن اَنت ءُ آ اے ھمے رنگ ءَ لَٹ ءُ کُٹانی دیمپانی ءَ کنگ کپ ایت اِنت – گوستگیں شپ ءَ نودربرانی پُر ایمنیں زھرشانی ءَ پولیس ءَ لَٹ ءُ کُٹ، دزگیری ءُ پد ءَ دروگیں ارزی گرزیانی اے گپ ءِ منانک ءَ دنت کہ بلوچستان ءِ سرکار مھلوک ءِ جیڑھاں تاکت ءَ گون گشینگ لوٹ ایت اِنت بلے اے تاکت ءَ ھچبر نودربر پروشت کرتگ نہ کرتگ اَنت نانکہ آ وتی ھکانی پدجنی ءَ دزکش بیتگ اَنت –
جارکش ءَ گشتگ کہ میڈیکل انٹری ٹیسٹ ءِ نودربر گوستگیں دوازدہ روچاں وتی جائزیں ھکانی واستا پُر ایمنیں زھرشانی ءَ بیتگ اَنت، زھرشانی ءِ بنداتی روچ ءَ نودربر ھمے رنگ ءَ روچ ء رھمانی لَٹ ءُ کُٹانی نشانگ کنگ بیتگ اَنگ، یکشلیں زھرشانی ءَ پد گوستگیں شپ ءَ پُر ایمنیں رنگے ءَ نندانک ءَ نشتگیں نودربر گورنر بلوچستان ءِ نیمگ ءَ ستکی دیگ بیتگ اَنت آ اشانی لوٹاں سرجم کنت ءُ مروچی دوزادہ بج ءَ داں نوٹیفیکیشن ءَ شنگ کنت بلے لوٹانی سرجم کنگ ءَ ابید سرکار ءُ انتزامیہ ھوار بیتگ ءُ نودربرانی سر ءَ ارش اش کرتگ – اے وڑیں راہ ءُ رھبندانی کار گرگانی مول ءُ مراد بس نودربراں وتی ھکانی گستا کنگ ءِ پندل اَنت –
بلوچ یکجھتی کمیٹی ءَ نودربرانی ھلاپ ءَ پولیس ءِ زور ایر جتگ ءُ گوشتگ کہ اے پدردیں وئیل بژنیگ اِنت اے پُر ایمنیں ورنایانی گپانی گوشدارگ ءُ آیانی جائزیں لوٹانی سرجم کنگ ءَ ابید تاکت ءِ کارمرد کنگ دردیگ اِنت – نودربرانی سر ءَ پولیس ءِ اے رویش یکدم گیز زمہ داری ءُ نا انساپی ءُ زوراکیاں ھوار اِنت وھدیکہ دومی نیمگ ءَ سرجمی ءَ آیانی یل کنگ ءَ ابید آ جیلانی تہ ءَ کنگ بیتگ ءُ آیانی بگیری ءَ ارزی نبشتگ کنگ وانگ ءُ زانت ءِ دشمنی ءَ ابید دگہ ھچ نہ اِنت –
جارکش ءَ گشتگ کہ بی وائی سی اے لوٹ ءَ کنت کہ اے بے گناہ ءُ بزگیں نودربراں سرجمی ءَ یلو بہ کنت ایانی ھلاپ ءَ جوڑ کرتگیں ارزی کشگ بہ بنت ءُ اگاں سرکار ءَ اے چیز سرجم نہ کرت اَنت یا آئی ءَ اے وڑ ءَ کرت گڑا بی وائی سی نودربرانی سر ءَ زوراکی ناانساپیانی ھلاپ ءَ سرجمیں بلوچستان ءَ زھرشانیانی جار ءَ پرینین ایت –