کیچ: تیل ءِ کار ءُ بار ءَ ھواریں دو کس پاکستانی پوج ءِ دست ءَ بیگواہ

کیچ ءِ دمگ بلیدہ ءَ پاکستانی پوج ءَ زوراکی کنان ءَ دو مردم زورانسری آوار جنگ ءَ پد بیگواہ کتگ اَنت-

سربوتگیں ھالانی رِد ءَ کیچ ءِ دمگ بلیدہ ءِ ھند میناز ءَ چار روچ ءَ ساری پاکستانی پوج ءَ بیڑبرتگ ءُ زوراکی کنان ءَ دو مردم آوار جنگ ءَ پد بیگواہ کتگ اَنت –

آوار جنگ بوتگیں مردمانی پجّار محمد شاہ ءُ اسلم ناماں چہ زانگ بوتگ اَنت دمگی مردمانی رِد ءَ اے دوئیں مردم پاکستانی پوج ءَ میناز وتی لوگاں چہ آوار جتگ ءُ بیگواہ کتگ اَنت-

دمگی اھوالکارانی رِد ءَ اے دوئیں مالی جاوراں گریب لاچاریں مردم اَنت وتی چُکانی گُژنگ ءِ پروشگ ءَ بارڈر ءَ تیل کار ءُ بار کنگ ءَ بوتگ اَنت کہ آ آوار جتگ ءُ بیگواہ کتگ اَنت-

زانگ بہ بیت بلوچستان ءَ بیگواھیں مردمانی لَڑ روچ پہ روچ دراج بوان اِنت ھمکروچ پاکستانی پوج ءُ آئی ءِ چیردستی ءَ کارکنوکیں ڈیتھ اسکواڈ ءِ کارندہ بلوچ ورناہ ءُ کماشاں چست کنگ ءُ بیگواہ کنگ ءَ اَنت –

دومی نیمگ ءَ ماں شال ءَ بیگواھیں مردمانی یل کنائینگ ءِ ھاتر ءَ یک دْراجیں مدتے بیت کہ ماما قدیر بلوچ ءِ سروکی ءَ چہ یک نندانک بُنجلے جوڑ کنگ بوتگ دانکہ بیگواھیں مردمانی توار دگنیا ءَ سر بہ بیت ءُ آ پاکستانی پوج ءَ لگام دیگ ءَ گامگیج بزور اِیت-

بلے پاکستانی پوج ءِ زُلم ءُ زوراکیاں چہ اَبید ھم انسانی ھکّانی باسک ءُ انسانی ھکّانی گلانی بے تواری یک بژنیں گپے-