نبشتانک: ماہ شان، منی ءُ مرگ ءِ نْیام ءَ تھنائی پَش کپتگ
نبشتہ کار: مھروان کمبر
دی بلوچستان پوسٹ
ماھو! مرچی تو بے کِساس گیر پیداک ئے، اے ساھت ءَ من وتی ابیتک ءُ بے تواریں کُوٹی ءَ نشتگاں دگہ کس نیست بس من ءُ رولہ ، روزرد ءُ تھنائی چمانی دریچک ءَ نشتگیں تئی یاتانی کیپاں نوشگ ءَ اِیں ھردیں بیگاہ ءِ مُلوریں ساھتاں کہ ساھگ دْراجتر بَہ اَنت گُڑا چمّانی دریگ ءَ اُوشتاتگیں ارس چو رگاماں شل اَنت تئی ءُ گلزمین ءِ دُوری ءِ کِسّھاں کار اَنت۔ پد ءَ ھر چیزّ ءَ تھنائی ءِ چادر مانپوش اِیت ءُ تھنا باں من، اے ابیتکیں بیگاہ ، رولہ ءُ روزرد ، اے مُرگانی توار، اے کوش ءِ زیمر، اے جنگل ءِ درچک ءُ دار پد ءَ ھر شپ تھنائی یاتانی ژانگاں بند اِیت ابیتک ءُ بے تواریں کوٹی ءَ ناچ ءَ لگّ اِیت یاتانی تہ ءَ ھر ھما نِدارگ ھوار بَہ اَنت کہ وتی گُلزمین ءَ تئی ھمراھی ءَ دیستگ اَنت یا کہ مار اِتگ اَنت نہ زان آں چُنت سال اِنت کہ نہ ترا دیستگ، نہ وتی مھلبیں زمین دیستگ، بس درانڈیھ ءُ درامدیں مردُم اَنت، کبر گونگیں کُوٹی ءُ تئی بے کراریں مھروان کمبر اسل ءَ اے تئی ءُ گُلزمین ءِ یاتانی کرار اِنت کہ من بے کراراں۔
ماھو! یک اِنسانے وتی زندگی ءِ تہ ءَ بازیں وھد ءَ بازیں جاہ ءَ وڑ وڑیں جاوراں گوں دُچار کپ اَیت آئی ءِ زندگی ءِ تہ ءَ ھزاراں روچ انچیں کَیت کہ آئی ءِ یاداشت ءِ تاکانی تہ ءَ گار ءُ بیگواہ بَہ اَنت، بلے لھتیں روچ ءُ لھتیں دمان انچیں بَہ اَنت کہ سرجمیں زندگی ءَ آئی ءِ دل ءُ ارواہ ءِ سر ءَ نکش بَہ اَنت آ ھم یک انچیں روچے اَت کہ من گم ءُ رنجانی دُنیا ءَ وتی پُرشتگیں وابانی شِنگ ءُ شانگیں ٹُکّرانی نزّ آرگ ءَ سیاہ گْواتانی میار بیت آں۔ ھو! آ یک سُرمگیں بیگاھے اَت، ھر نیمگ ءَ یک بے کیپیں ابیتکی ءُ بے تواری یے ءَ مانپوشتگ اَت روچ دیم پہ رولہ ءَ جُنزان اَت سارتیں گْواتے کشگ ءَ اَت تاکریچ ءِ موسم اَت جُتائی ءِ موسم اَت دُوری ءِ موسم اَت تاک چہ درچکاں جُتا بوھان اِت اَنت، کونج چہ رماں ،رولہ چہ رنگاں ءُ من چہ گلزمین ءَ۔
ماھو! ھردیں درانڈیھ ءَ تاکریچیں موسماں درچکانی زردیں تاک کپ اَنت ءُ رھسراں شِنگ اَنت ، اُمیتانی چراگ مِران بَہ اَنت سارتیں بیگاہ برپانی چادر ءَ مانپوش اِیت ءُ رولہ ءَ درست وتی گِساں واتر بَہ اَنت ، گُڑا من وتی شوھاز ءَ باتن ءِ بے تواریں دمکاں درکپان ءُ جیڑگانی در ءَ ٹُکّاں جیڑاں کہ منی ھم لھتیں واب اِت اَنت ، واھشت ءُ ارمان اِت اَنت، پد ءَ بِہ گِند ئے جاور مٹّ اِت اَنت یاکہ موسم، نہ زان آں! بلے اِنچو زان آں کہ ھر چیز چہ من پچگرگ بوت۔ نہ آگھیں چمّانی واب پشت کپت اَنت نیکہ واھشت، نہ ارمان نہ کرار، بس ھما زمانگ ءِ لھتیں یات۔ زھیر چکاریں گْوست ءِ ابدمانیں ترانگ ءُ بے کراری پہ من ءَ پشت کپتگ اَنت، پرچا کہ بے کراریں نِگاہ ءُ موتک آؤرتگیں چمانی ارساں چہ ابید زیبائیں نِدارگ، بچکندانی وشبو، ٹھکانی زیمر، نودانی شنزگ، تیاب ءِ چول، مُرگانی الھان، دِرین ءِ رنگ، پیاپیں استین، سُھب ءِ سمین، کلکشان، ماھِکان ءُ شپ جڑکوکیں اِستال ، ھر چیز من ھمود ءَ شمُشت ءُ اتک آں۔
ماھو! نُوں رولہ ءُ روزرد سیاہ ءُ تھاریں شپے ءَ بدل بیتگ اَنت ءُ اے ساھت ءَ لُنج ءُ تاموریں شپ ءِ گُڈّی پاس جُنزان اِنت ءُ کندیل ءِ مِر مِرانکیں رُژن ھم وتی ساھکندن ءَ سر بیتگ بلے منی واب انگت چمانی دیار ءَ چہ بیگواہ اِنت، برے برے ھمے گُمان بیت منی وابانی ھمراھی ءَ مئے جِند ھم یک انچیں جنگے ءَ بیگواہ کُتگ کہ اُود ءَ ھلک ءُ دیار نیست، نیکہ مردم ھست بس چاریں نیمگ ءَ بے تواری ءَ مانشانتگ ءُ ھمے بے تواری ءِ دریا منی دل ءِ ویرانیں کبرستان ءِ ھما ویرانیں کبر ءِ سر ءَ موتکاں آرگ لوٹ اِیت کہ کرنے ءَ پیسر من وتی جند گوں پُرشتگیں واباں، ناسرجمیں واھشت ءُ ارماناں کل کُتگ اَت۔
ماھو! اے درانڈیھ ءِ نہ وشیں ساھتاں منی گْور ءَ ھچ نیست، بس منی ءُ مرگ ءِ نْیام ءَ تئی ءُ گُلزمین ءِ گِندگ ءِ بھشتیں واب ءُ تھنائی ءَ ابید دگہ ھِچّ پَش نہ کپتگ، ھِچّ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔