شال ءَ بیگواھیں مردمانی ھاتر ءَ زھرشانی برجاہ

زورانسری آوار جنگ ءُ بیگواہ بوتگیں مردم سی ٹی ڈی ءِ ھوالہ ءَ کنگ بوگ ءُ دروگیں میڑ ءِ نام ءَ کُشگ بوگ ءَ انت – ماماقدیر

بلوچستان ءِ بنجاھی شھر شال ءَ پریس کلب ءِ دیم ءَ وی بی ایم پی ءِ زھرشانی برجاہ، زھرشانی ءَ مروچی چار ھزار ءُ سَے سد ءُ پنجاہ ءُ سَے روچ سرجم بوتگ -چہ ڈیرہ غازی ھان ءَ سیاسی ءُ چاگردی باسک نور محمد بزدار بلوچ، اللہ داد بزدار بلوچ ءُ دگہ مردماں بنجل ءَ اتکگ ءُ بیگواھیں مردمانی کھولانی گوما دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ وھدیکہ زالم ءُ ایردستانی میان ءَ جنگ بندات بیت گڑا آ دست گوشیں مردمانی سر ءَ زوراکی بندات کنت، زاہ ءُ بد کنت ھمایاں کہ پیش ءَ انسانیت ءِ گپ جتگ نوں زوراکی کنگ ءَ اَنت بلے اے ایردستیں راجاں ھچ کرت نہ کن انت سامراجی تاکت لس بلوچانی آوار جنی ءَ پد زندانانی تہ ءَ لٹ ءُ کُٹ کن انت اگاں ناں مرچی باند ءَ بیگواھیں مردماں سی ٹی ڈی ءِ ھوالہ کن انت ءُ دروگیں میڑ ء نام ءَ جن انت کُش انت – آئی ءَ گوشتگ کہ ھنچوش کہ ھنوں مارواڑ ءِ وئیل بوتگ –

ماما قدیر بلوچ ءِ گوشگ ات کہ زورامندیں تاکت ھونوار بنت آ ھچ کس ءِ پرواہ ءَ ندار انت آ چہ سامراج ءِ نیمگ ءَ کشت ءُ ھون کنگ ءِ ھاتر ءَ دارگ بنت آ ایردستیں راجانی ھلاس کنگ ءِ ھاتر ءَ سک باز کُشت ءُ کوش کن انت –

آئی ءِ گوشگ ات کہ گوستگیں ھپتاد سالاں بگر تاں روچ ء مروچی پاکستان ءِ زورامندیں تاکت بلوچ ورنایانی، مات ءُ گوھارانی برات ءُ کماشاں شھید کنان ءُ پیداک انت –

آئی ءِ گوشگ اَت کہ ورنا ھمے وڑ ھچ نہ گوش انت ءُ نندنت ءُ دژمن ءَ موہ بہ دے اَنت گڑا آ روچ دور نہ اِنت کہ مارا چہ کس نہ بچّ ایت –