نبشتانک: تھاری ءَ مان پوشتگیں ائید
نبشتہ کار : سبُل نیاد
دی بلوچستان پوسٹ
رمزان ءِ گُڈّی روچ اَت، مگرب ءِ وھد نزیک اَت ءُ من چہ وتی لوگ ءِ دمک ءَ میتگ ءِ کسانُکیں دُکان ءَ روگ ءَ اِت آں کہ پہ وت هِنّی یے زوراں انچو گْوشگ ءَ باندا ائید اِنت مئے میتگ ءَ یک پیرزالے ھست اَت ءُ آ مُدامی وتی لوگ ءِ دپ ءَ نشتگ اَت، اے پدی ھم نِندوک اَت۔ من وھدے دیم پہ وتی گِس ءَ چہ دُکان ءَ واتر بوت آں، چار آں پیرزال انگت لوگ ءِ دپ ءَ نشتگ ءُ نوں دبوج ءِ وھد ھم بُوَگ ءَ اَت۔
من ھمے پِیرزال ءِ کِرّ ءَ شُت آں کہ گْوشان ئِے نوں تو لوگ ءَ برو کہ بانگ بُوَگ ءَ اِنت من کہ کِرّ ءَ ئِے شُت آن ءُ چاراں کہ من ءَ ھِچ وڑ ءَ چارگ ءَ نہ اِنت انچو گْوش ئے پہ گاریں چیزّے ءِ واست ءَ نشتگ ءُ ودارِیگ اِنت، ءُ چمّ ئِے گوں وتی لوگ ءِ دیمی نیمگ ءِ کشک ءَ سک اَنت انچو سما بیت کہ پہ کسے ءِ آیگ ءِ ودار ءَ نِشتگ گُڑا من جُست کُت بلّی تو اِد ءَ نشتگ ئے ءُ لوگ ءَ نہ رو ئے بانگ ءِ وھد اِنت۔۔۔؟ آئی ءَ وتی سر سُرینت ءُ گْشت اِنّا ! من پد ءَ جُست کت کہ تو بلکیں یکّے ءِ ودار ءَ نشتگ ئے؟ گیمرتگیں گینّسارتے کشّ اِت ءُ سر ئِے سُرینت ءُ درائینت کہ ھَو!
گوں اے درد سرّیچیں پسّو ءَ پد من دیم پہ وتی لوگ ءَ رھادگ بوت آں ، دو گامے جَنَگ ءَ پد من سما کُت کہ اے تھار مگرب ءَ کئی ودار ءَ نشتگ۔۔۔؟ من بِرتر اِتان ءُ واتر اتک ءُ جُست کُت، بَلّی تو گُڑا کئی ودار ءَ نشتگ ئے۔۔۔؟تو نہ زان ئے اُردُل! من وتی دوستیں مردُم ءِ ودار ءَ نشتگ آں ، باندا ائید اِنت بلکیں بئیت ءُ من مہ گندان ئِے من جُست كُت تئی دوستیں مردُم کَے اِنت زاناں ؟ منی نُماسگ اِنت تئی نُماسگ! کُج ءَ اِنت زاناں ؟ منی نُماسگ ءَ چار سال بیت کہ گار ءُ بیگواہ اِنت، پاکستان ءِ پوج ءَ بُرتگ ءُ انگت گار اِنت۔
ھمے ساھت ءَ مگرب ءِ بانگ بوت ءُ آئی وتی چم بُرز ءَ کُت اَنت ءُ آزمان ئِے چار ات دِل ءِ توک ءَ دُوا کُت ءُ آئی چم چہ ارس پُر بوت اَنت ءُ وتی گار ءُ بیگواھیں نُماسگ ءِ کِسّہ ءَ گْوشگ ءَ اَت۔
من ھمد ءَ اُوشتاتگ اِت آں کہ شپ وتی تھاری ءَ مان شانگ ءَ اَت۔ من ءَ اے ساھت ءَ لوگ ءَ رَوگی اَت بلے آئی زند ءِ تھاری ءِ دیم ءَ اے تھاری ھِچّے نہ اَت۔ من وتی دل ءِ توک ءَ جیڑگ ءَ لگ اِت آں کہ اِیشی ءِ واست ءَ ھم باندا ائید بیت۔۔۔؟من ءَ چیزّے گْوشگی اَت، بلے ھچ گْوشت نہ کُت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔