شال: زاکر مجید بلوچ ءِ بیگواھی ءِ ھلاپ ءَ زھرشانی کنگ بیت اِنت، زھرشانی ءَ بھر زیرگ ءِ دزبندی مات ءَ کرتگ

زاکر مجید بلوچ ءِ کھول ءَ وتی شنگ کرتگیں درشانی ءَ گوشتگ کہ نودربر رھشون زاکر مجید بلوچ ءِ زورانسری بیگواھی ءَ دوازدہ سال سرجم بیگ ءَ شال ءَ زھرشانی ءِ جار ءَ پِرینتگ ءُ گوشتگ کہ بازیں وھدے ءَ زورانسری بیگواہ کنگ بیتگیں زاکر مجید بلوچ ءَ دیم ءَ نیارگ انسانی ھکانی لگتمالی اِنت سیزدہ اپریل ءَ شال ءَ یک زھرشانی ءِ کنگ بیت اِنت –

آئی ءَ گوشت کہ زاکر مجید بلوچ یک نودربر رھشون ءَ ایمنیں سیاسی جھدکارے کہ آ ھشت جون ءَ مستونگ ءِ پڑنگ آباد ءَ آوار جنگ ءُ بیگواہ کنگ بیتگ – زاکر مجید بلوچ ءِ بیگواھی ءَ دوزادہ سال سرجم بیگی اِنت بلے تنی وھدی آئی ءِ کھول ءَ آئی ءِ بارہ ءَ ھچ ھال دیگ نہ بیتگ – گوستگیں دوازدہ سالانی تہ ءَ کھول یک ناوشیں زندگی ءَ گون دُچار اَنت ءُ زاکر مجید ءِ پیر زالیں مات گوستگیں دوازدہ سالاں شال، کراچی ءُ اسلام آباد ءِ دگانی سر ءَ وتی زھگ ءِ واستا در پہ دری اِنت-

آئی ءَ گوشت کہ زاکر مجید بلوچ ءِ یل کنگ ءِ واستا آئی ءِ گوھار پرزانہ مجید ءَ کراچی ءَ داں اسلام آباد ءَ پند بُر اِتگ ءُ میان اُستمانی ادارھاں ھوار پاکستانی کانودانانی دراھیں در ٹک اِتگ اَنت ءُ کسے ءَ پسو نہ داتگ – آئی ءِ یل نہ کنگ ءِ سر ءَ آئی ءِ کھول ءَ جتا جتائیں زھرشانی ءُ انسانی ھکانی گلاں زاکر مجید ءِ یلہ کنائینگ ءِ دزبندی کرتگ –

زاکر مجید ءِ مات گوستگیں دوازدہ سالاں وائس فار بلوچ مسنگ پرسنز ءِ بنجل ءَ نندوک اِنت ءُ کانودانانی سروکاں یلہ کنگ ءِ لوٹ ءَ کنگ ءَ اِنت – میان اُستمانی ءُ ڈیھی ادارھانی نیمگ ءَ ھچ وڑیں گامگیج گندگ ءَ آیگ ءَ نہ بیگ ءَ آئی ءَ لاچاری ءَ دگہ بیگواھیں مردمانی کھولانی ھمراھی ءَ اسلام آباد ڈی چوک ءَ نندانک جنگ کپتگ چریشی ءَ سرکار ءِ سدکی ءَ پد پاد اتکگ اَنت –

آئی ءَ گوشت کہ سدکی دیگ ءَ پد ھم سرکار ءِ نیمگ ءَ ھچ گامگیج نہ زورگ ءُ زاکر مجید ءِ بیگواھی ءَ دوازدہ سال سرجم بیگی اِنت -زاکر مجید ءِ کھول آئی ءِ یلہ کنائینگ ءِ ھاتر ءَ یک ناوشیں زندگی ءَ گوں گوزگ ءَ اَنت -آئی ءَ بازیں وھداں بیگواہ کنگ ءَ پد ھم آئی ءَ دیم ءَ نیارگ یک گیر انسانی درچے ءُ ما اے گیر انسانی درچ ءِ ھلاپ ءَ زاکر مجید ءِ کھول ءِ نیمگ ءَ سیزدہ اپریل ءَ سَے شمبے ءِ روچ ءَ شال ءِ پریس کلب ءِ دیم ءَ یک زھرشانی ءِ برجم دارگ بیت اِنت – دراھیں انسان دوست ءُ راجدوستیں مردماں زھرشانی ءِ بھر زورگ ءِ دزبندی ءَ کن ایں –

ھمے درگت ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ یک تامر بندے ءَ ھم گوشتگ کہ زاکر مجید ءِ مات ءِ دزبندی ءَ باندا یک زھرشانی ءِ کنگ بیت اِنت چریشی ءَ دراھیں تکاں بندوکیں مردماں بھر زورگ ءِ دزبندی کرتگ –