میران ڈینجرے نہ اِنت – ھوران کلمتی

نبشتانک: میران ڈینجرے نہ اِنت

نبشتہ کار: ھوران کلمتی

دی بلوچستان پوسٹ

کَوَل ء ڈاکٹر ئیگ ءَ زندگی اِنت یار بیت چو بیت مردم مردم ءَ را یل کن اَنت ءُ پشت ءَ مان دے اَنت رو اَنت ءُ پد ءَ بس تَھنائی پشت کپ اِیت بَلے زان ئے تَھنائی سَکیں بے پسّوئیں چیزے، من اوں ڈاکٹر ساب ءِ ھمے گپ ءِ سر ءَ زندگی ءِ پلسپہ(فلسفہ ) گُٹ ءَ تاویز کُتگ اَنت داں من تئی ھال نہ اِش کُتگ اَت من گوں وت ءَ مُدام ھَمے گُشتگ اَت کہ تو پُشت مان داتگ ءُ نہ زاناں کُجا شُتگ ئے ءُ من ءَ چہ بے تواری ءَ تو سستگ ئے من ءَ گیشتر تئی ھمے گپ واب ءَ نیل اِیت کہ تو گُشتگ اَت زندگی چیزاں چوں گران کنت گند ئے؟ بہ گندئے تو سرپد مہ بہ ئے بَلے من تئی ھما بچکند ءِ گپ ءَ آں کہ تو منی دیم ءَ اوشتاتگ اَت ئے ءُ پد ءَ گس ءِ روگ ءَ پد تئی کلوہ اتکگ اَت داں تو گلہ کنگ ءَ اَت ئے کلوہ ءَ نبشتہ اَت کہ ھَما مرد کہ بس تَھنا ھمے گپ ءِ اِش کنگ ءَ پہ تو مہ تل اَت ، گْوشت نَدْریگ اِتاں تی شیرکِنیں لبزانی کہ تو من ءَ گُش ئے مرچی مہ رو ھَو مہ رو کمو انگت جَل نندیں دیوان کن ایں پد ءَ باریں کد اِے وڑیں روچ دوبر بئیت۔

بہ گند ئے تو سرپد اَت ئے کہ ھمے کمو جَلگ زند ءَ پد ءَ سَکّ گران کنت ؟ من تئی گپ ءُ گلہ ءَ نہ زان آں چی ءَ ڈالچار کُت اَنت ھمے شپ انگت من ءَ یات اِنت ءُ تو سرپد ئے من ءَ شپ ورگ ءَ اِنت چوشیں شپ نیست کہ تئی ترانگ من ءَ گون نہ اَنت-

تو گپّے زان ئے ؟من ھما اِنت کہ تئی ھال اِش کُتگ من چہ جبین ءَ پْرشت آں ،من اِے گپ وَ زانتگ اَت کہ اد ءَ کس ءَ نیل اَنت چی ءَ کہ پد ءَ ھما ڈاکٹر ساب ءِ گپ دماگ ءِ مجگانی تہ ءَ کیت کہ ما اَنچیں اھدے ءَ چم پچ کُتگ اَت کہ اود ءَ جنگ ءِ بوگ اِنت مئے سر ءَ زوریں جنگے کپتگ ءُ اِے جنگ کس ءَ پشت نہ دات زاھر اِنت جنگ ءِ اھد ءَ ودی بوتگیں بلوچ ءَ لٹ وَ ورگیگ اِنت ءُ تو اوں لٹ ورگ ءَ ئے تو اوں ٹارچر سیل ءِ تہ ءَ ھما جنگ ءِ اھد ءِ بلوچ ئے کہ ترا ھرچ ھال ءَ بزگ وَ بوگی اِنت دزبندی اِنت واتر کن من زان آں تئی دستاں بوتیں تو ھینچو روچ ءَ نہ داشتگ اَت بَلے چی کناں دل اِنت گنوک اِنت سرپد نہ بیت۔

تو زان ئے ؟ کدی کدی بیگاہ ءَ تئی ترانگاں کپ آں الله۔کدی کدی اِنّا بَلکیں چوشیں ھچ وھد ءُ ساھت نیست کہ تو یات نیائے ۔بَلے تو وَ زان ئے یار من ھیل کُتگ گپے بیت کہ نہ بیت منی گپانی بندات ھمے گپ ءَ گوں بیت کہ تو گپے زان ئے کدی کدی ھاھاھا ءُ پد ءَ ترا منی ھَمے گپ ءِ سر ءَ سَکّ زھر اتکگ اَت من اَنی کہ پہ تو اِے نبشتاک ءَ نبشتہ کنگ ءَ آں من ءَ تئی میران جان ءِ نام کندینگ ءَ اِنت میران ڈینجر ھھاھا شُوم من ترا چینچو رند ءَ گُشتگ اَت کہ اِے نی نامے شُوم ڈینجر ترا کوشارین اِیت یک روچے –

ھمیش اِنت زوراکیں رستراں ترا وتی ارجان جت ءُ بُرت من زان آں اِے زالم ترا اِے جُست ءَ الم کن اَنت کہ یہ ڈینجر کیا ہے؟ بَلے تو ایشاں ستر سرپد کنگ ءِ جُھد بہ کن اِے ھما کن اَنت ءُ ایشانی دل اِے ھمے سرپد اَنت کہ پاکستان ءَ ترا چہ ھترہ (خطرہ) اِنت پرچا کہ تی نام میران ڈینجر اِنت-

برے برے دل گُش اِیت کہ ماما کدیر ءِ ھمراہ بِہ بہ ئے گاریں مردمانی کیمپ ءَ برو ءُ تی اکس ءَ دست ءَ بہ کن مردماں ھال بہ دئے کہ میران ڈینجرے نہ اِنت ایشی ءَ زندگ بوگ ءَ بِل اِت بَلے من بس تَھنا نامے ھوران آں من ءَ پھل کن کہ من پہ تو ھچ کُت نہ کنگ آں-

دلگوش میران ھمل چہ پانوان ءَ شپ ءِ نیم ءَ 3 مارچ 2021 ءَ
پاکستان ءِ ناپاکیں لشکر ءَ آور جَنَگ ءَ پد گار ءُ بیگواہ کُتگ دنیگت بیگواہ اِنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔