روکپتی بلوچستان ءَ گوستگیں بیست ءُ چار ادارانی تہ ءَ دگ ءِ وئیلاں شش بیران، بیست ءُ دو مردم زدگ بیتگ اَنت

وئیل روکپتی بلوچستان ءِ جتا جتائیں جاھاں پیش اتکگ اَنت کہ دگ ءِ وئیلاں شش مردم بیران ءُ چاردہ زدگ بیتگ اَنت، ایرانی سیکورٹی ادارھاں یک گاڑی ءِ سر ءَ تیرگواری کرتگ ءُ سواریں مردم زدگ بیتگ اَنت-

سر بیتگیں ھالانی رد ءَ گوستگیں روچ ءَ روکپتی بلوچستان ءِ دمگ ایرانشھر ءَ رؤکیں گاڑی ریگان ءَ سِی مِل گستا یک تیرلی ءُ سواری گاڑی ءَ ٹکر وارتگ کہ چریشی ءَ چار مردم بیران ءُ دَہ زدگ بیتگ اَنت –

اھوالکار ءِ رد ءَ دَھیں زدگیں مردمانی تہ ءُ پنچ کَسانی جاور نگیگ گوشگ بیتگ اَنت، گاڑی ءَ اوگستان ءِ جھمنندیں مردم سوار بیتگ اَنت –

ھمے رنگ ءَ ایرانشھر ءَ داں ھاش ءِ رؤکیں گاڑی ءِ چَپ بیتگ ءُ چریشی ءَ ھشت کس زدگ بیتگ اَنت –

ھمے رنگ ءَ دزاپ دیم پہ نسر آباد ءِ دگ ءَ دو گاڑیاں ٹکر وارتگ ءُ چریشی ءَ دو کَس بیران ءُ چار زدگ بیتگ اَنت –

وئیل ءَ پد زدگ ءُ بیران بیتگیں مردم لاش کشیں گاڑیاں چِست ءُ کرتگ ءُ دزاپ ءَ ھاتم اللہ انبیا ءِ نادراہ جاہ ءَ سر کنگ بیتگ اَنت –

ھمے وڑ ءَ سراوان شمس آباد ءَ ایرانی سیکورٹی فورسز ءَ یک گاڑی ءِ سر ءَ تیرگواری کرتگ ءُ چریشی ءَ باز کس زدگ بیتگ اَنت –

ایرانی سیکورٹی فورسز ءِ گوشگ اِنت کہ ما شَک ءِ بنیاد ءَ گاڑی ءِ سر ءَ تیرگواری کہ گاڑی ءَ نَشہ آماچیں چیز مان اَنت –

روکپتی بلوچستان ءَ سیاسی ءُ چاگردی مردمانی گوشگ اِنت کہ بلوچستان ءِ دگ مردمانی ساھگیریں جاھے جوڑ بیتگ اَنت –

آیانی گوشگ اِنت بلوچستان آ دگہ دنیا ءَ جتائیں رنگے ءَ پیش کنگ ءَ اِنت بازیں کَچے ءَ مردمانی ھون ھمک داب ءَ رچگ ءَ اَنت –