تیر سُپتگیں جون ءُ بیگواھیانی تہ ءَ گیشی
ٹی بی پی اھوال
بلوچستان ءِ ھمک مردم وتی باریگ ءِ ودار ءَ کنگ ءَ اِنت ھمک وھد ءَ راھگوزی، لوگ ءَ وپتگیں، وانگجاہ ءُ شھدربرجاھاں وانوکیں مردمانی چم رژنائیں روچ ءَ اَنت بلے اے روچ آیاں سر نہ بیت اِنت ءُ پیسر ءَ تھاری مانشان کنت۔
بازیں وھدے ءَ بلکیں دو دھکاں گیش اِنت کہ بلوچستان ءَ یک ھنچیں بیم ءُ ترسے ودینگ بیتگ کہ اود ءَ ھمک مردم، وتی دل ءِ اندر ءَ جیڑ ایت کہ من اگں گپ بہ کن آں بلکیں من ھم ھمے تھاری ءِ اندر ءَ کپ آں ءُ گار باں چوناھیگا اے تھاری پاکستان ءِ بلوچستان ءِ گرگ ءَ پد اتکگ، کہ ھمک زمانگ ءَ اے تھاری ءِ بلوچ وتی روچ ءِ شوھاز ءَ چِست اَنت ءُ پیداک اَنت بلے نِی اے تھاری ءِ ساھگ کمے پراہ تِر بیتگ ءُ بلوچستان ءِ کُنڈ کُنڈ ءَ سر بیتگ۔
اے نوکتریں تھاری ءُ مردمانی گرگ ءُ بند کنگ پاکستان ءِ مزن نامیں تاکتوریں پوجی سروک ءُ پاکستان ءِ مھتر ءِ سروک جنرل مشرف ءِ وھد ءَ سال دوھزار ءَ بندات بیتگ اَت۔
اے گرگ ءُ بندیانی تہ ءَ بلوچستان ءَ راجکارانی بگیری ءَ پاکستانی کانود سری ءَ دو سر ترند بیان بیت اَنت۔ اے ترندکاری ءَ پاکستانی چیریں ادارھاں بلوچانی بازیں سروکے چہ بلوچاں پُل اِت، گار ءُ بیگواہ کنگ، کُشت ءُ کوش، روچ رھمانی تیرانی آماچ کنگ اے بلوچستان ءِ زمین ءِ سر ءَ ھرجاہ ءَ گندگ ءَ کاینت ۔
ھمے درچ ءَ بیگواھیں مردمانی کھول پہ وتی مردمانی درگیج ءَ لاچاری اَنت ءُ دگ پہ دگ اَنت کانودانی چیر ءَ زیرمنتی ءَ ابید ھم آیانی کھولاں چوشیں آسرے نہ رس اِتگ کہ آ سارت ءُ ایمنی ءَ وتی لوگانی تہ ءَ نشت بہ کن اَنت۔
ھمے رنگ ءَ گوستگیں ماہ ءَ بیگواھیں بلوچانی کھولاں وت ءَ اسلام آباد ءَ رسینتگ اَت کہ اود ءَ آیاں وتی گاریں مردمانی پدجنگ ءَ نندانک ءُ زھرشانی کتگ اَت، نندانک پاکستان ء بنجاھی تھت اسلام آباد نیشنل پریس کلب ءُ چریشی ءَ پد کھولاں ڈی چوک ءَ بُرتگ اَت کہ اے جاہ ءَ پاکستان ءِ مزن مزنیں مردمانی راہ ءُ در اِنت ھرکس بلکیں مئے ھرساں دیت کُت بہ کنت دانکہ مئے گاریں جگرانی ٹکر مارا واتر بہ رس اَنت ۔
اے کھول بازیں روچاں نندانک ءَ پد یک آسرے ءَ واتر اِت اَنت ءُ دیم پہ وتی گساں شت اَنت، پاکستان ءِ واکداراں گُشتگ اَت کہ ھشت مارچ ءَ شما سرپد کنگ بہ ئے ءُ پانزدہ مارچ ءَ شمئے گاریں مردمانی بارہ ءَ سرجمیں رپورٹ دیم ءَ آرگ بنت ۔
ھشت مارچ ءِ روچ ءِ ٹک ءَ گوں بلوچستان ءَ گار ءُ بیگواھیں مردمانی ھرسانی تیاریں ءُ لوھڑیں ھار گیشتر بیت اَنت کہ بلوچستان ءِ دمگ مستونگ ءَ پنچ مردمانی دیم پہ دیمی جنگ ءِ نام ءَ کوش ءِ ھال سی ٹی ڈی ءَ شنگ کتگ اَت ۔
کاونٹر ٹیررازم ڈیپارٹمنٹ ءَ پنچ مردمانی جون ھما وھد ءَ چگل داتگ اِت اَنت کہ گار ءُ بیگواھیں مردم وتی اُمیتانی ودار ءَ نندوک بیتگ اَنت ۔
دمگی مردمانی رد ءَ اے پنچیں مردم پاکستانی چیریں ادارھاں پیسر ءَ دزگیر کتگ ءُ برتگ اَنت ءُ اے دروگیں جنگ ءِ نام ءَ کُشگ بیتگ اَنت، بلوچستان ءَ اے اولی بر نہ اِنت کہ چوشیں وئیل دیم ءَ آیگ ءَ اَنت بلکیں چِد ءُ پیسر ھم دوھزار ءُ بیست ءَ راجن پور ءَ یک ھنچیں وئیلے ءَ پولیس ءَ گوشتگ اَت کہ پنچ مردم دیم پہ دیمی جنگ ءَ کُشگ بیتگ اَنت، اشی ءَ ابید ھم بلوچستان ءِ جتا جتائیں جاھاں ھمک سال چوشیں ھالانی ھال چاگردی رسانکجاھاں شنگ بیگ ءَ اَنت ءُ آیانی پشدر ءَ لس مردم ھمے گپ ءَ جنگ ءَ اَنت کہ پاکستان پیسر ءَ دزگیر کرتگیں مردماں گرگ ءُ کُشگ اِنت ۔
ھمے درگت ءَ بلوچ اھوالکار سعید دشتی ءَ وتی چاگردی رسانکجاہ ٹوئٹر ءَ نبشتگ کرتگ کہ ھشت مارچ ءَ پاکستان ءِ بنجاھی شھر اسلام آباد ءَ بیگواہ بیتگیں مردمانی کھولانی گون ءَ ھما زبان کتگ اَت کہ ھشت مارچ ءَ داں جوانیں گامگیجے زورگ بیت اِنت۔
آئی ءَ وتی ٹویٹ ءَ گیشتر نبشتگ کتگ اَت کہ گامگیج زورگ بیتگ بلے چریشانی سندھ ءُ بلوچستان ءَ شش مردم یل بیتگ کہ آیانی جان ھشکیں کُنٹ اَنت ۔
مستونگ ءَ دروگیں جنگ ءَ پیسر ءَ دزگیر کُتگیں بلوچانی پجار ءُ بیگواہ بیگ ءِ وھدانی درگت ءَ رستگیں ھال چو اے پئیم ءَ اَنت، اے پنچیں مردمانی تہ ءَ دو کس ھمے سال ءِ جنوری ءِ ھژدہ ءَ بلوچستان ءِ بنجاھی شھر شال ءِ رودراتکی شھدگ ءَ پاکستانی پوج ءِ ایگل اسکواڈ ءَ پَٹ ءُ پول ءِ وھد ءَ سمیع اللہ پرکانی ءُ جمیل پرکانی دزگیر کتگ اَنت ءُ چریشی ءَ پد سی ٹی ڈی ءَ ٹاہ داتگ اَت اے مردمانی گور ءَ دستی بمب دزکپتگ۔
اشانی تہ ءَ سَے مردم عارف مری ءُ آئی ءِ ناکوزتک یوسف مری کہ بنکی ءَ بولان جھالڑی ءُ سیمی شاہ نزر لشکر کشی ءِ میان ءَ دزگیر کنگ بیتگ اَنت ءُ پد ءَ اشانی بارہ ءَ ھچ سرپدی نہ بیتگ ۔
اے مردمانی کوش بلوچستان ءِ آجوئی ءَ واستا جد ءُ جھد کنوکیں سیاسی پاٹی بلوچ نیشنل مومنٹ ءَ ھم ایر جتگ ءُ گوشتگ کہ اے مردم پیسر ءَ گرگ بیتگ ءُ زنداناں کنگ ءُ کُشگ بیتگ ءُ چگل دیگ بیتگ اَنت کہ اے مردمانی کوش بلوچ نسل کُشی ءِ تہ ءَ ھواریں بھر اَنت ۔
بلوچ نیشنل مومنٹ ءَ گوشتگ کہ اے مردمانی تہ ءَ سمیع اللہ پرکانی ءُ جمیل پرکانی ھژدہ جنوری ءَ دزگیر کنگ بیتگ ءُ عارف، یوسف، بیست ءُ ھپت فروری دوھزار ءُ بیست ءَ سبی ءَ کرپاس ءِ ڈگارانی سر ءَ دزگیر کنگ ءُ برگ بیتگ اَنت ءُ شاہ نزر دومی روچ ءَ گرگ ءُ برگ بیتگ ۔
بلوچستان ءَ بندوکیں سیاسی پاٹی نیشنل پاٹی ءِ بنجاھی سیکرٹری جنرل جان بلیدی ءَ ھم اے وئیل ایرجتگ ءُ گوشتگ کہ پاکستان دروگیں جنگ ءِ نام ءَ بیگواھیں بلوچاں کُشگ ءُ چگل دیگ اِنت ۔
ھمے رنگ ءَ بلوچستان نیشنل پاٹی ءَ گوشتگ کہ بیگواھیں بلوچاں دروگیں جنگ ءِ نام ءَ پولیس ءِ دست ءَ کُشتگیں مردمانی کوش ءَ ایر جن آں ءُ یک رندے پد ءَ بلوچستان ءَ ھونریچی ءِ گام تیز کنگ بیتگ اَنت ۔
ھمے رنگ ءَ بلوچستان ءَ بیگواھیانی تہ ءَ ھم اے روچانی تہ ءَ گیشی اتکگ کہ گوستگیں روچاں پنچ مردم دزگیر کنگ ءُ برگ بیتگ اَنت ۔
اشانی تہ ءَ پنجاب ءِ شھر ملتان ءَ وانوکیں کیچ ءِ جھمنند نوید گوستگیں روچ ءَ بلوچستان ءِ بنجاھی شھر شال ءَ گرگ بیتگ ۔
نوید تربت ءِ جھمنند اِنت ءُ چکاس دیگ ءَ پد شال ءَ سر بیتگ ءُ اود ءَ پاکستانی پوج ءُ اسپیت پوشیں مردماں دزگیر کرتگ ءُ پجاہ نیاؤرتگیں جاھے ءَ برتگ کہ آئی ءِ ھال نیست ۔
ھمے رنگ ءَ نوشکی ءِ جتا جتائیں جاھاں سَے کس ریاض بادینی، چنگیز بلوچ ءُ اعجاز بلوچ دزگیر کنگ ءُ برگ بیتگ اَنت۔
ھالانی تہ ءَ گوشگ بیتگ کہ ریاض بادینی ءُ چنگیز بلوچ سَے روچ ءَ پیسر نوشکی ءِ بازار ءِ نزیک ءَ پاکستانی پوج ءُ چیریں ادارھاں دزگیر کرتگ ءُ برتگ اَنت کہ چنگیز بلوچ ایم سی بی بینک ءِ پھزدارے بیتگ ۔
سیمی ورناہ اعجاز بلوچ ھم گوستگیں روچ ءَ گرگ بیتگ کہ جورکین نوشکی ءِ جھمنند اِنت ءُ بی ایم سی ءِ نودربر اِنت ۔
ھمے رنگ ءَ سبی ءِ دمگ بادرا ءَ یک مردمے دزگیر بیتگ کہ آئی ءِ پجار زرین خان مرگیانی ءِ عزیزو ءِ نام ءَ بیتگ ۔
بلوچستان ءَ ماتانی سارتیں ساھگ واتر بنت یا آیاں ھُشکیں کُنٹانی دروشماں دزکپ اَنت ھمک جون ءِ دزکپگ ءَ پد ھمک مات ءِ دل اشی ءَ الم جَنت کہ منی بچ سلامتی کئیت یا ملامتی ۔
بلوچانی سارتیں واب چون سرجم بنت، بلوچ چون دیم ءَ وتی ورنایاں رکینت کن اَنت اے ھما مردماں پہ وت ءَ جیڑگ لوٹ ایت۔
بلوچستان ءِ جاور اگاں اے داب ءَ روان بہ کن اَنت گڑا بلوچستان ءَ ورناہ نا ونت کن اَنت نا روزگار ءُ سیل ءُ سواد کُت کن اَنت ھرکس وتی مرگ ءَ چمانی وت گند اِیت۔