کیچ ءَ پاکستانی پوج ءَ دمگانی راہ ءُ دربستگ اَنت ءُ کوھی دمگاں مانرتکگ

سر بیتگیں ھالانی رد ءَ کیچ ءِ جتا جتائیں جاھاں پاکستانی پوج ءِ لشکر کشی ءُ بازیں جاہ پوج ءَ انگیر ءَ کرتگ اَنت –

گیشیں ھالانی رد ءَ کیچ ءِ دمگ تمپ کوھاڈ ءِ کوھی دمگاں پاکستانی پوج ءَ لشکر کشی بندات کرتگ، لشکر کشی ءَ پوج ءَ کوھی دمگ انگیر کرتگ ءُ راہ ءُ در بستگ اَنت –

دمگی مردمانی رد ءَ گوستگیں شپ ءَ پاکستانی پوج کوھاڈ ءُ پُل آباد ءِ میانی کوھی دمگ گَٹی ءَ شتگ اَنت ءُ اود ءَ پوج ءَ راہ ءُ در بستگ اَنت –

دمگی مردمانی رد ءَ ھمے گمان کنگ بیگ ءَ اِنت کہ پوج یک لشکر کشی ءِ کنگ ءَ اِنت ءُ دگہ مردماں دمگ ءَ روگ ءُ آیگ ءَ نیلگ ءَ اِنت –

ھمے وڑ ءَ کیچ ءِ دمگ ھوشاپ ءَ ھم پاکستانی پوج بازیں کچے ءَ مُچ بیتگ ءُ راہ ءُ در اش بستگ اَنت –

زانگ بہ بیت گوستگیں ماہ ءَ بلوچستان ءِ بنجاھی شھر شال ءَ پاکستان ءِ تھ ئِے کارانی وزیر ءُ بلوچستان ءَ پاکستانی ایف سی ءِ آئی جی ءِ میان ءَ گند ءُ نند بیتگ اَت –

گند ءُ نند ءَ دمگاں لشکر کشیانی بارہ ءَ سوڑگ بیتگ اَت ءُ چریشی ءَ پد بلوچستان ءِ بازیں جاھاں پوجی لشکر کشیانی تہ ءَ گیشی گندگ آیگ ءَ اِنت –

کیچ تمپ کوھاڈ ءَ لشکری بیڑ ءِ بارہ ءَ پوج ءِ نیمگ ءَ تنی وھدی دگہ گپ دیم ءَ نیاتکگ اَنت –