نبشتانک: شھید نورلحق بلوچ پنام بارگ جان
نبشتہ کار: ھانل بلوچ
دی بلوچستان پوسٹ
خاران ءَ بلوچ راجی جھد ھما وھد ءَ درنگاز بوت کہ شھید نورالحق جان بارگ چہ میٹرک ءِ وانگ ءَ پد پَہ گیشیں وانگ ءِ ھاتر ءَ ماں شال ءَ شُتگ ات۔
شھید بارگ جان شال ءَ سائنس کالج ءِ نودربرے اَت، اود ءَ گوں بلوچ اسٹوڈنٹس آرگنائزیشن آزاد ءِ سنگتاں نزدینک بوت ءُ چہ بی ایس او آزاد ءِ کِشک ءَ بلوچ راجی آجوئی ءِ پگری راہ ءُ راھبنداں وتی جھد بندات ئِے کُت، اے ھما وھد اَت کہ پرویز مشرف ءِ زوراکیانی آس بلوچستان ءِ چاریں آتراپاں جمبور اَت، بی ایس او آزاد ءِ سنگت گار ءُ بیگواہ ءَ ات انت ءُ باز سنگت شھید بوت اَنت، وانگ جاہ، دربرجاہ ءُ شھدربرجاہ آرمی کالونی جوڑ اَت انت ءُ ھرّوچ بلوچستان ءِ ھرکُنڈ ءُ دمگاں بلوچ ورناہ، پیر ءُ کماشانی لاش ودی بوت انت، ھرّوچ بلوچ نودربر ءُ پگری ئیں سنگت گار ءُ بیگواہ اَت اَنت، ھمے دھر ءَ شھید بارگ جان ءَ وتی راج ءِ گم بڈّ ءَ زرت انت ءُ خاران ءِ سرڈگار ءَ وتی پگری ءُ وانشتی جھد بندات ئِے کُت۔
خاران ءِ یک یک سنگتاں گوں گند ءُ نند ئِے کُت، سنگتاں بلوچ راجی جھد ءِ ھاتر ءَ سرپدی ئِے دات ءُ بلوچ راج ءِ سر ءَ زلم ءُ زوراکیاں ، راج ءِ بزگیاں تران ئِے کُت ، شپ ءُ روچ گوں ھمے کاراں گلائیش اَت، آئی ءِ جھد زوت سوب مندی ءِ نیمگ ءَ رھادگ بوت ءُ خاران ءَ یک آشوبی چراگے زندگ بوت، ایف ایس سی چکاس ءِ دربرگ ءَ پد شھید بارگ جان پَہ گیشیں وانگ ءِ ھاتر ءَ سند ٹنڈوجام ءَ شُت ءُ وتی وانگ شھدربرجاہ ءَ بندات ئِے کُت، بلے آ چہ وتی وانگ ءَ گیشں پَہ خاران ءِ نہ ونتگیں سنگتاں پگر مند ات ءُ آئی ءِ ھوش ءُ ھیال بِہ خاران ءَ اَت، گڑا شھید بارگ جان ءَ وتی وانگ وھد دات ئِے نہ کت ءُ خاران ءِ سنگتاں راجی جھد ءِ سرپدی دیگ ءُ وانینگ ءِ بندات کُت ئِے، شھید یک دور اندیش ءُ مزن پگریں بامردے ات، آئی ءِ چماں یک روژنائیں بانداتے ودی اَت، مدام آئی ءِ دستاں استمانی ءُ میان استمانی کتاب ھست ات انت، ھر یک سنگت ءَ را کتاب ئِے دات پہ وانگ ءَ ءُ پد ءَ گوں سنگتاں ھما کتاب ءِ سر ءَ گپ ءُ تران ئِے کُت، اگاں سنگتاں آئی ءِ داتگیں کتاب مہ ونتیں ءُ پد ءَ کتاب ءِ سر ءَ گپ ءُ تران مہ کتیں بزاں سنگتاں کتاب مہ ونتیں گڑا شھید بارگ جان سک ملور بوت ءُ سک زار گپت بلے پد ءَ گوں وتی مھروانیں بچکندگاں سنگتاں پنت ءُ نسیت ئِے کت کہ بلوچ ءَ را وانگی انت، مارا وتی راج ءِ بزگی پھمگی انت، مئے دژمن سک چالاک ءُ مکار اِنت۔
دژمن ءِ داتگیں دروگیں کتابانی وانگ ءَ مئے وتی راجی راجدپتر سیائیں مجاں اندیم انت، وتی راج ءَ بوان اِت ءُ سرپد بوگ ءِ جھد ءَ بِہ کن اِت، آئی ءَ مدام میر حمل کلمتی ءُ پرتگیزی ءِ جنگ ، شھید محراب خان ءُ انگریز ءِ جنگ ءُ بلوچ خان ءُ انگریز ءِ جنگ، نورا مینگل ءُ انگریز ءِ جنگانی کِسّہ ءُ شھید بابو نوروز خان ءُ پنجابی لشکر ءِ جنگانی گپ ءُ ھبر ئِے کت ءُ راج ءِ راجدپتر ءِ بارو ءَ تران ئِے کت، شھید بارگ جان ءَ گوں جنگ ءَ تپاک نہ کُت۔
آئی ءَ مدام مھر ءُ دوستی ءُ وشھالی ءِ درونت داتگ، آئی ءِ تب ءُ مئیل مھر ات آ یک مھرانیں دوستے اَت، آئی ءَ را امینکس گوں شے مرید ءُ ھانی ءِ سرزمین ءَ مھر اَت، ھمینکس مھر پہ ھانی ءَ مرید ءَ ھست اَت، مست توکلی ءُ سمو ءِ گپ ءَ مہ کن، کہ سمو آئی ءِ ارواہ ءَ گوں ھور ات، شھید بارگ جان یک سموے اَت کہ آئی ءِ مھراں مست توکلی جوڑ اَت ءُ سنگتاں آئی ءَ را مست ءِ نام ءَ ھم یات کتگ ، آئی ءِ نام ءَ چہ یکے مست اَت۔ شھید بارگ ءِ سمو کے اَت۔ ؟ سنگتاں مدام آئی ءَ را جست کت گڑا آئی ءَ درائینت کہ سید زھور شاہ ھاشمی ءِ ھانی ءُ ھانل کے بوتگ!!! انچو منی سمو منی گلزمین اِنت ءُ من مست توکلی آں ، گلزمین ءِ توکلی آں، انچو کہ آئی ءَ گشت کہ من توکلی آں ھمے وڑ ءَ پد ءَ توکلی ءِ دروشم ءَ پہ وتی سمو ءَ ندّر بوت ءُ ابدمانیں اِشک ءَ سوبین بوت، بزاں آ یک مھروانیں بامردے ات، کتاب ءُ وانگ ءِ دلدیدہ ات، وانگ ءُ زانگ ءِ پڑ ءَ یک شرّیں ءُ سرپدیں استادے زانگ بوت، بلے آئی ءَ پہ وتی گلزمین ءِ سانکلانی پروشگ ءِ ھاتر ءَ تپنگ کوپگاں کُت ءُ بلوچستان ءِ کوہ ءَ یاگی بوت یک مھروانیں بامردمے اگاں تپنگ بِہ زور اِیت ءُ سلاہ بند بہ بیت اے ھماں مھر انت کہ ایشی مز ءُ کیمت نیست، شھید بارگ جان ءَ پنجابی ریاست ءِ ادارگانی وانگ ءَ چہ زیات جھد آجوئی ءَ شرتر لیک اِت ءُ وتی راہ شہ پنجابی وانگ ءَ گستا ئِے کُت جھد ء آجوئی ءِ یک سنگتے جوڑ بوت، انچو کہ خاران ءِ تَہ ءَ یک شُئوری ءُ پگری سوچے آؤرت ئِے ھمے رنگ ءَ گوں کوہ ءَ ھم یک زمہ داریں سنگتے اَت، جھد ء آجوئی ءِ ھاتر ءَ ھر وڑیں کربانی ءَ چک ءُ پد نہ بوت۔
شھید بارگ جان سلا بندی ءِ اُھد ءَ بگر داں گڈی روچاں چہ یک پادے ءَ لنگ اَت یک کوپگے ءَ وتی پرشتگیں پاد ءِ ھاتر ءَ لٹ ئِے بڈ ءَ اَت ءُ دومی کوپگ ءَ دژمن ءِ ھلاپ ءَ تپنگ ئِے کوچ ءَ اَت کوہ ءِ زند پہ جان دُراہ ءُ آسراتیں مردماں سک گِران انت بلے شہید بارگ جان یکیں پاد ءَ بلوچستان ءِ درائیں کوھاں گَشت ءُ دژمن ءِ ھلاپ ءَ جنگ ئِے کت ءُ سلاہ بند ات ھزار پریشانی ءُ جنجال ءَ پد شھید بارگ جان ءَ گوں دژمن ءَ ماتیں سرزمین ءِ سودائی نہ کت، کوہ ءِ سنگتانی ھاتر ءَ یک شرّیں استادے اَت، چہ وانگ ءِ باریگ ءَ بگر داں گُڈی روچاں شھید ھزار مسیبت ءُ پریشانی برداشت ئِے کت ءُ گُڈی وھد ءَ ماں تراسانی خضدار ءِ کوھاں گوں شھید دل جان ءِ ھواری ءَ 19 پروری ءِ روچ ءَ گوں دژمن ءَ دیم پہ دیم ءَ جنگ ئِے دات ءُ مزنیں دژمن ئِے مردار کُت، گُڈی تیر وتی جند ءِ واست ءَ کارمرز ئِے کُت ءُ ابدمان بوت بلے دژمن ءِ دیم ءَ وتی سر جھل ءَ ئِے نہ کت۔
مروچی ئیں روچ ءَ شھید بارگ جان ءُ شھید دلجان ءِ سیمی سال روچ انت، بلے من گنداں کہ آئی ءِ رتکگیں ھون ءِ برکت ءَ مروچی خاران ءَ راجی جھد ءِ چراگ سک رژنا انت، کہ گوستگیں روچاں پہ شھید بانک کریمہ ءِ ھاتر ءَ ھزارانی کساس ءَ مئے خاران ءِ مات ءُ گھار روانک ءِ ونڈ ات انت ءُ پنجابی ریاست ءِ ھلاپ ءَ روانک ءِ تہ ءَ زھرشانی ءُ تران اِش کُت بزاں 2006 ءُ2007 ءِ وھد ءَ کہ شھید بارگ جان خاران ءِ تہ ءَ گوں چار سنگت ءَ راجی جھدیں شئوری وانشت ءُ پگری ھیال ءِ گپ ءُ ھبر ئِے کت، گڑا من ھمے سرپد بوت آں کہ خاران ءَ کدی چشیں مردم پیداک نہ بیت کہ راجی جھد ءِ بھر بہ بیت، من مدام ھمے گپ گشت کہ نورالحق جان وتی وھد ءَ زوال کنگ ءَ انت بلے مروچی شھید بارگ جان ءِ جھد ءَ من ءَ رَد کرت۔ شھید ءِ جھد ءُ کربانی زوال نہ بوت انت۔
مروچی ایندگہ دمگانی وڑ ءَ خاران ھم سرجم ءَ جھد ء آجوئی ءِ اولی سْرپ ءَ اوشتاتگ، خاران ءِ ھر لوگ ءِ تہ ءَ شھید بارگ جان ءِ پگر زندگ انت، بزاں شھید بارگ جان زندگ اِنت ءُ مزنیں نوجوان ءَ شھید ءِ کپتگیں تپنگ زُرتگ ءُ کوہ ءَ سلاہ بند انت، مروچی شھید ءِ ارواہ آسودگ انت مروچی شھید گوں وتی ماتیں گلزمین ءُ گوں مھروانیں سمو ءَ امباز اِنت ءُ وتی سمو ءِ مھراں چکار انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔