نبشتانک: وژنامی
نبتشہ کار: ھِدایت بلوچ
وژنامی یک انچیں وش ءُ شیرکِنیں نامے کہ ھرکس ءَ وتی زند ءَ اے نام پہ وت ءَ دوست بیت ، بلے پہ اے وژنامی ءِ شوھازگ ءَ اِنسان ءَ را وتی زند ءَ چندے کار الم کنگ لوٹ اِیت کہ آئی ءِ نام وژنام بیت۔
انسان کہ واجہ ھُدا ءَ جوڑ کُرتگ آئی ءِ زند ھرچ ھال ءَ گْوز اِیت ، پہ گژن ءُ بزّگی بیت یا پہ مال ءُ متاہ ءُ آسودگی بیت لھتیں بے سِنچ ءُ نازانتیں مردُم وتی دُگنیائی مالءُ متاہ ، زر ءُ دولت ، زند ءِ آسراتیاں چار اَنت وت ءَ را بلائیں ھستی لیک اَنت بلے اے گپ اُوں راست اِنت کہ اے دگنیا ءَ ھرکس آسودگی ءُ آسراتی لوٹ اِیت۔ زرّ ءُ دولت ، موٹل ءُ سواری ھرکس ءَ رس اِیت ، بلے وژنامی ھرکس ءَ پہ دیم نسیب نہ بیت پہ وژنامیں زند ءُ وژنامیں مرگ ءَ سک باز جُھد کنگ لوٹ اِیت۔
راجانی تہ ءَ انچیں مردُم بوتگ کہ آیانی مال ءُ دولتانی گپ ءَ اگاں بہ کن ئے شپ روچ شپ بَنت، بلے آیاں پہ راج ءَ ، پہ زُبان ءَ ، پہ مِسکیں گُلزمین ءَ ھِچّ نہ کُرتگ۔
بلکیں گوں زمین ءِ دُژمناں ھمکوپگ بوتگ اَنت ءُ وتی راج اِش تاوان بار کُرتگ ، بلے داں جھان ھست اِنت اے وڑیں مردُمانی نام پُولِنگ اِنت۔
مرگ و الم ءَ کَیت ، بلے وتی زند ءَ انچیں کارے بہ کن کہ داں ھپت پُشت ءَ تئی نام پہ وژنامی گِرگ بِہ بیت۔
مردُم اگاں ستر مالدار ءُ دولت مند بِہ بیت ، مرگ ءَ رند یک ءُ دو پُشت ءَ آئی ءُ مالداری ءِ توسیپ ھلاس بیت ، چی ءَ کہ پہ مالداری آئی ءِ نام پشت نہ کپ اِیت ۔
بلے اگاں یک دست سُبک ءُ وش تب ءُ راج دوستیں مردمے چہ جھان ءَ رُکست کنت ، داں جھان ھست اِنت اے مرد ءِ نام پہ وژنامی ءُ توسیپ گِرگ بیت۔
اگاں تو وژنام بوگ لوٹ ئے ، گُڑا دُگنیا ءِ ھما نامیں مردُمانی رندگیری ءَ بہ کن کہ آیاں چندے لب ءُ متاہ ءِ ھاتر ءَ وتی راج ءِ سودا نہ جتگ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔