بے گت ءُ گمان ءَ درانڈیھ ءَ کریمہ بلوچ ءِ شھیدی تاوان اِنت – بشیر زیب بلوچ

دی بلوچستان پوسٹ

بی ایس او آزاد ءِ گوستگیں چیئرمین ءُ بلوچ لبریشن آرمی ءِ انوگیں سروک بشیر زیب بلوچ ءَ گْوشت کہ بلوچ راجی آجوئی ءِ جنز ءَ راجداریں باسکانی بے کچوئیں دیمونی راجدپتر ءِ تاکاں نمیران اَنت –

اے گپانی درشان آئی ءَ چاگردی رسانکجاہ ٹوئٹر تندجاہ ءَ کینیڈا ءَ بی ایس او آزاد ءِ گوستگیں سروک کریمہ بلوچ ءِ شھیدی ءِ پژدر ءَ کرتگ اَنت –

آئی ءَ گْوشت کہ درانڈیھاں کریمہ بلوچ ءِ بے گت ءُ گمانی شھیدی یک تاوان ئے، کریمہ بلوچ یک مھکم ءُ دھشتے ءِ واھند بیتگ، آ ترندیں جاورھالانی تہ ءَ ھم بی ایس او ءِ پتر ءَ گوں مھکمی ءَ بندوک بیتگ –

بشیر زیب بلوچ ءَ گْوشت کہ بلوچ راجی آجوئی زرمبش ءَ راجداریں باسکانی بے کچوئیں دیمونء راجدپتر ءَ نمیران اَنت –

زانگ بہ بیت کریمہ بلوچ ءَ دو ھزار ءُ شش ءَ وھدے بشیر زیب بلوچ بی ایس او ءِ سروک گچین کنگ بیتگ گڑا کریمہ بلوچ ءَ بی ایس او ءَ ھوار بیگ ءُ ستاشانی ءَ بی ایس او آزاد ءِ بنجاھی پتر ءِ باسک نامینگ بیتگ –

دو ھزار ءُ ھشت ءَ شال ءَ بنجاھی پتر ءِ نیاد ءَ بشیر زیب دوبر سروک نامینگ بیتگ گڑا اے نیاد ءَ کریمہ بلوچ کسان کمک سرکماش نامینگ بیتگ –

چریشی ءَ پد دوھزار ءَ چاردہ ءَ زاھد بلوچ ءِ بیگواہ بیگ ءَ پد کریمہ بلوچ بی ایس او آزاد ءِ بنجاھی سرکماش نامینگ بیتگ ءُ چریشی ءَ پد بلوچستان ء جاور ھال گیشتر نگیگ بیان بیتگ اَنت گڑا آئی ءَ کینیڈا ءَ راجداری ءِ میاربندی زرتگ ءُ کہ اود ءَ لھتے روچ ءَ پد آئی ءِ زانگولیں جون دزکپتگ –

کریمہ بلوچ ءِ کوش ءِ ھلاپ ءَ بلوچستان ءَ ھمک تکاں بندوکیں مردم ترندیں رنگے ءَ توار چِست کنگ ءَ اَنت –