آواران ءَ پاکستانی پوج ءِ سر ءَ اُرش، اُرش ءِ زمّہ واری بی ایل ایف ءَ منّ اِتگ –

دی بلوچستان پوسٹ

ھور ءَ پوجی پانگس ءِ سر ءَ دورجنگیں توپک ءُ دگہ سلاھاں گوں اُرش کُتگ ءُ جانی ءُ مالی تاوان داتگ – میجر گْوھرام بلوچ

سربوتگیں ھالانی رِد ءَ مروچی چارشمبے روچ ءَ آواران ءِ دمگ ھور ءَ ناشُناسیں سلاہ بندیں مردماں پاکستانی پوج ءِ پانگس ءِ سر ءَ اُرش کُتگ، اُرش ءَ پاکستانی پوج ءَ جانی ءُ مالی تاوان رس اتگ ـ اُرشکار درآیگ ءُ رؤگ ءَ سوبین بوتگ انت –

دومی نیمگ ءَ بلوچ راجی آجوئی لوٹوکیں زرمبشت بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مروچی نُھ دسمبر چار شمبے روچ ءَ مگرب ءِ وھد ءَ مئے سرمچاراں آواران گیشکور ءِ دمگ ھور ءَ برجاھیں پاکستانی پوج ءِ پانگس ءِ سنگر سر ءَ دورجنگیں توپک ءِ سر ءَ اُرش کُتگ یک کارمندے کُشتگ ءُ پد ءَ ھما دمان ءَ پوجی پانگس ءِ سر ءَ راکٹ دگہ مزنیں سلاھاں گوں اُرش کُتگ، اُرش پانگس ءِ تہ ئِے ایندگہ پوجی کارمند مُرتگ ءُ ٹپی بوتگ انت –

گڈسر ءَ میجر گوھرام بلوچ ءَ گوشتگ کہ ایردستیں بلوچستان ءِ آجوئی ءَ تاں زورگریں پوج ءِ سر ءَ مئے اُرش برجاہ مان انت –