شھید مختار بلوچ، عزیز بلوچ، ساجد بلوچ ءَ سھرچکیں دروت ندر کنیں – بی ایل ایف

دی بلوچستان پوسٹ

بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ گوستگیں روچ ءَ ھپت دسمبر ءَ زامران ءِ کوھی دمگ دشتک ءَ بی ایل ایف ءِ سرمچار گوں پاکستانی پوج ءَ دپ کپتگ انت جنگ ءُ چوپ بندات بوتگ کہ دو اداراں داں برجاہ بوتگ – اے جنگ ءُ چوپ ءَ گل ءِ سَے سرمچار شھید بوتگ ءُ دژمنیں پوج ءِ بازیں کارمندے مرُتگ بازینے زدگ بوتگ اَنت –

جارکش ءَ گوشتگ کہ سرمچار تر ءُ تاب ءَ بوتگ انت کہ پاکستانی پوج ءَ انگیر کنگے جھد کُرتگ بازیں جنگ ءُ چوپ ءَ آدگہ سرمچاریں سنگتاں دژمن انگیر پُروشتگ ءُ درآیگ ءُ رؤگ ءَ سوبین بوتگ انت –

جارکش میجر گْوھرام بلوچ ءَ دیمتر ءَ گوشتگ کہ شھید بوتگیں سرمچارانی تہ ءَ مختار بلوچ پنّام ءِ اُستاد نور جھمنند ملک آباد، عزیز بلوچ پنّام ءِ چاکر جھمنند ملک آباد ءُ ساجد بلوچ پنّام آسمی جھمنند سری گڈگی بالگتر ھوار انت – ما آھاں سھر چکیں دروت ندر کنیں کہ آھاں بلوچستان ءِ آجوئی ھاتر ءَ ایردستی ءِ بگیری ءَ جد ءُ جھد کُرتگ ءُ وتی سرانی دیمونی داتگ – آھانی جد ءُ جھد ءُ دیمونی پہ مئے ھاتر ءَ روکیں کندیلے ءِ رژن اِنت –

جارکش ءَ گوشتگ کہ مختار بلوچ گوستگیں پانزدہ سالاں بی ایل ایف ءِ پتر ءِ سر ءَ آجوئی ءِ ھاتر ءَ جد ءُ جھد ءَ بوتگ آ اے وھدی ءَ میجری اگدہ ءِ سر ءَ بوتگ ءُ اوتاک ءِ کماندار بوتگ -آئی ءَ مزن بند دشت، مند، تمپ، بلیدہ ءُ زامران ءَ جنگ ءِ پڑ ءَ وتی پرز ءَ پیلو کنگ ءَ بوتگ – ساجد بلوچ نیٹورک کماندار بوتگ ءُ لیفٹننٹ اگدہ ءِ سر ءَ بوتگ -آئی ءَ بالگتر، بلیدہ ءُ زامران ءَ جنگ ءِ پڑ ءَ وتی پرز پیلو کرتگ –
عزیز بلوچ گوستگیں ھپت سالاں گوں بی ایل ایف ءَ بندوک بوتگ ءُ آئی ءِ نَد نام حیات گُل ءِ نام ءَ شائری ھم کُرتگ – آئی ءَ دشت، تمپ، ناصرآباد، بلیدہ ءُ زامران ءَ جنگ ءِ پڑ ءَ وتی پرز پیلو کُرتگ آ جنگی سوھوی ءَ ھوار یک شائرے ھم بوتگ آئی ءَ وتی شائری گالانی سر ءَ ھم راج ءِ لوٹ درشان کُرتگ ءُ وتی راج ءُ سنگتانی دلبڈی کُرتگ –