بلوچستان ءَ جھانی وباء کرونا وائرس ءِ آماچ بوتگیں مردمانی کچ روچ پہ روچ گیش بوان انت، بیست ءُ چار ادارانی میان ءَ دو نودربراں ھوار شانزدہ دگہ کیس دیم ءَ اتکگ کہ کرونا وائرس نادراھی ءِ آماچ بیتگ انت –
دی بلوچستان پوسٹ
جانسلامتی بلوچستان ءِ شنگ کرتگیں رپورٹ ءِ رِد ءَ یک شمبے ءَ بلوچستان ءِ تہ ءَ چارسد ءُ سِی ءُ ھپت مردمانی کرونا ٹیسٹ کنگ بوتگ اے ٹیسٹاں بلوچستان ءِ چاردہ نوکیں کیس دیم ءَ اتکگ چریشی ءَ پد بلوچستان ءَ کرونا وائرس ءِ آماچ بوتگیں درسیں مردمانی کچ شانزدہ ھزار ءُ چار سد ءُ ھپت ءَ سر بوتگ اَنت –
رپورٹ ءِ رد ءَ بیست ءُ چار ادارانی میان ءَ کرونا وائرس ءِ آماچ بوتگیں سی ءُ پنچ مردمانی جاندراھی ءَ پد بلوچستان ءَ جاندراہ بوتگیں مردمانی کچ پانزدہ ھزار ءُ ھشت سد ءُ پنجاہ دو ءَ سر بوتگ اَنت – جانسلامتی ءِ رپورٹ رِد ءَ دنیگتا بلوچستان ءِ تہ ءَ جھانی وبا کرونا وائرس ءَ چہ بیران بوتگیں مردمانی کچ یک سد ءُ پنجاہ ءُ شش ءَ سربوتگ اَنت –
رپورٹ ءِ تہ ءَ گوشگ بوتگ کہ بلوچستان ءِ وانگجاھانی تہ ءَ دگہ دو نودربرانی کرونا ٹیسٹ پوزٹیو اتکگ چریشاں پد بلوچستان ءِ تہ ءَ جھانی وباء کرونا وائرس ءِ آماچ بوتگیں نودرانی کچ ھشت سد ءُ چل ءُ شش سربوتگ اَنت –