نبشتانک: 13 نومبرشھمیریں شھیدانی روچ
نبشتہ کار: مھم جان گُل
دی بلوچستان پوسٹ
گُلامیں راج وت مُرتگیں راجے ، زندگ بیت نہ کنت پرچاکہ ساہ ءِ کَشگ ءَ بہ گر داں کہ ساہ ءِ اِیر برگ ءَ گُلام اِنت ءُ دِگرانی دست ءَ اِنت وتی زمین ءِ سر ءَ چو درامد ءَ چکرّ اِیت درامدیں زبان ءَ گَپ کنت درامدانی بادشاھی اِنت بلے وت گُلام اِنت مرتگ ساھے مان بلے اُشکیں کُنٹے پمیشکا گوش اَنت گُلامیں راج مُرتگین راج ءِ درور ءَ اِنت داں ھما وھد ءَ زندگ نہ بیت دانکہ وت ءَ آزات مہ کنت اے زند ءَ وتی آوکیں پَدریچ ءَ سوگات مہ کنت ۔
باندا تئی زھگ ترا ڈوبار اِیت جھد کن کہ باندا تئی آوکیں پَدریچ زندگ بہ بیت یک وتواکیں سرڈگارے ئے وت واجہ بہ بیت گوش اَنت کہ درچکے کِش ئے آئی ءِ بران اگاں ورگ لوٹ ئے گڑا آپ دیگ المی اِنت انچوش وتی زمین ءَ چہ بَدانی دست ءَ پَچگرگ ءُ وتی باندات ءَ رکینگ لوٹ ئے گڑا ترا ھون دیگ المی اِنت سرانی سر کُربان کنگ لوٹ اِیت اَنچوشکہ ڈیھ پھازاں وتی نُگراھیں سر پہ گُلزمین ءَ ندر کتگ اَنت پہ راج ءِ باندات ءِ واستا کہ باندا اے گُلامیں زند ءَ آ وتی کوپگ ءَ مہ لڈ اِیت ترا ھم وتی پَرز پیلو کنگی اِنت اگاں اے راہ ءَ شھید بیت ئے ابد نمیران بئے ھر یکے ءِ دل ءَ زندگ بئے باندا تئی آوکیں پَدریچ پہ شانے ترا ساڈہ ایت ترا یات کنت۔
مرچی شھیدانی روچ دارگ بیگ ءَ اِنت ھمے بامردانی روچ دارگ بیگ ءَ اِنت کہ پہ مردی وتی سر پہ ماتیں سرڈگار ءِ آجوئی ءُ آبرو ءِ رکینگ ءِ جھد ءَ ھر وڑیں سَکی ءُ سوری ءِ دیم ءَ چو کوہ ءِ البُرز ءَ مِک بیتگ اَنت دژمن ءَ وتی ھر پَندل پہ ڈیھہ پھازاں ساز اِتگ بلے بے سوب بیتگ اَنت پرچاکہ شھیداں وتی سرڈگار ءَ اَبید دگہ ھچ چوشیں چیز ھَرزش نہ داتگ کہ منی ءُ منی زمین ءِ میان ءَ میلانک بہ بیت ءُ من ءَ پَد کِنزگ ءِ ھاٹیگ بہ بکش اِیت ۔
مرچی ھمے بامردانی روچ دارگ بوگ ءَ اِنت داں جھان ھست اِنت شھید ھست اَنت نمیران اَنت۔
13 نومبر ھما سیاہ ءُ تھاریں روچ اِنت کہ انگریز سامراج ءَ کلات ءِ سر ءَ اُرش کُت میجر ولشائر ءِ کمانداری ءَ 13 نومبر 1839 ءَ میر مھراب ھان ءَ گوں بھادُری ءَ جنگ کنان ءَ گوں اِنگریز پوج ءِ دیم پہ دیمی جنگ ءَ پَدا شھید کنگ بیت اے روچ ءَ بلوچستان ءِ سرجمیں شھیدانی روچ گِچین کنگ بیتگ ءُ شھیدانی روچ دارگ بیت آیانی بھادُری ءُ ھِمت ءِ داستان دوبر بلوچ ءُ جھان ءِ دیم ءَ پچ کنگ بیت –
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔