مکھیں مات ءُ آئی ءِ دست ءِ اکس- عمران حکیم بلوچ

نبشتانک: مکھیں مات ءُ آئی ءِ دست ءِ اکس

نبشتہ کار : عمران حکیم بلوچ

دی بلوچستان پوسٹ

ھنچیں کِسّھے کہ روچ پہ روچ نوک بوان اِنت کوھن بوگ ءِ نام ءَ نزانت، کُجام کِسّہ ؟ کئی کِسّہ ؟ ھما کِسہ کہ یک ماتے ءِ دست ءِ اکس ءَ گوں بندوک اِنت مُدام کہ منی چم مکھیں مات ءَ کپ اَنت داں آئی ءِ دست ءَ یک اکسے ھست برے شال ءِ برپ گواریں دگانی سر ءِ برے کراچی ءِ آس گواریں گرمی ءَ ماں پریس کلب ءُ دگانی سر ءَ پند بُرّگ ءَ اِنت بس ارس گوار ایت-

من ءَ شری ءِ سر ءَ یاد نہ بیت کہ اے اکس اولی رند ءَ من کُجا دیستگ اَت بلے وھد 2019 ءِ بندات اَت کہ یک روچے سوشل میڈیا بزاں کہ پیسبک ءَ منی چم ھمے اکس ءَ کپت اَنت کہ ھمے اکس ءِ سر ءَ نبشتہ اَت راشد ھُسین-

من اے نام پیسر ءَ اِش نہ کُتگ من گوں راشد ءَ پجاروکی نہ بوتگاں وھد گوزان اَت اے کِسّہ نوک بوان اَت اے اکس ءَ من مُدام شال ءِ دگانی سر ءَ کراچی ءِ پریس کلبانی دیم ءَ، ءُ پیسبک ءَ سنگتانی والانی سر ءَ گِنداں یک روچے من جیڑ اِت کہ آھر کِسّہ چی اِنت؟ اے اکس چے ءَ روچ پہ روچ گیشتر گِندگ ءَ پیداک اِنت-

اے ھما وھد اَت کہ جاہ ءُ بے جاہ اِتاں برے سپر ءُ پند اَنت بلے یک روچے ما جاگھے ءَ نِشتگ اِت ایں ءُ تُربت ءِ سنگت ءِ منی کر ءَ اھتگ اَت آ سنگت من پیسر ءَ نہ دیستگ اَت بلے ھمے سنگت ءِ نمبر من ءَ یکے ءَ داتگ اَت کہ اے سنگت تئی نزیک ءَ اِنت دست بِگر ئِے ھیر سنگت من دست گپتگ اَت ما نِندوک اِت ایں پیسبک ءَ گوں سر ءُ پیٹال اِتاں داں کہ اے اکس پد ءَ منی دیم ءَ گوست من اکس سنگت ءَ پیش داشت اِشی ءَ پجا کار ئے؟ من جُست کُت-

آئی ءَ گُشت ھو اے راشد ھسین ءِ اکس اِنت ماھے ءُ چیزے روچ ئِے بیت کہ چہ ارب امارات ءَ آوار جنگ ءُ بیگواہ کنگ بوتگ.. راشد ھسین انسانی ھکانی یک کارکنے بوتگ-

شھید دلجان ءِ نام اِشکُتگ سنگت ءَ من ءَ جُست کُت ؟
دلجان ٹِک تیر من گُشت ھو راشد دلجان ءِ برات اِنت آئی ءَ من ءَ گُشت من دلجان ءِ تمردی ءُجنگولی ءِ کِسہ مُدام سنگتانی دپ ءَ اِشکُتگ اَنت دلجان یک تمرد ءُ دلیریں سنگتے جنگانی کِسّھانی تہ ءَ دلجان ءِ نام نکش اِنت راجدپتر ءِ تاکانی تہ ءَ دلجان نبشتہ اِنت-

اے مکھیں مات ءِ دِگہ یک اکسے منی چمانی دیم ءَ گوستگ کہ دلجان ءِ گُد چہ ھون ءَ میچل اَنت ءُ مکھیں مات ءَ امباز کُتگ ءُ دلجان پہ وتن سالونک کُتگ-

گوستگیں روچ ءَ شال ءِ برپ گواریں سارتی ءَ دگانی سر ءَ پد ءَ ھمے کارست گِندگ بوت کہ مکھیں مات ءَ راشد ھسین ءِ اکس بگل ءَ کُتگ اَت ءُ بس ارس گوارگ ءَ اَت مکھیں مات یک رندے پد ءَ من شال ءِ دگانی سر ءَ ارس گوارگ ءَ دیست-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔