بلوچستان ءِ جتا جتائیں وئیلاں زھگے بیران ءُ چار مردم ٹپی

دی بلوچستان پوسٹ

بلوچستان دمگ پنجگور ءَ لین کرنٹ ءِ گرگ ءِ سوب ءَ ھپت سالی ئیں گونڈوے بیران ءُ لورلائی ءَ دگ ءِ وئیل ءَ چار مردم زدگ بیتگ اَنت –

ٹی بی پی پتر ءَ سربیتگیں ھالانی رِد ءَ پنجگور ءِ دمگ سوردو ءَ لین ءِ کرنٹ ءِ گرگ ءِ سوب ءَ ھپت سالی ئیں زھگے بیران بوتگ –

بیران بوتگیں زھگ ءِ پجار چَہ داؤد ء منیر احمد ءِ نام ءَ بوتگ – کرنٹ ءِ گرگ ءَ پد گونڈو ءِ لاش ھسپتال ءَ برگ بوتگ – اژدری چار ءُ ٹپاس ءَ پد گونڈو ءِ لاش کھول ءِ گور ءَ سر کنگ بوتگ –

دومی نیمگ ءَ لورلائی ءَ دگ ءِ وئیل ءَ پی ٹی آئی گل ءِ رھشون ءَ ھوار چار مردم ٹپی بوتگ اَنت –

اھوالکار ءِ رِد ءَ گوستگیں روچ ءَ چہ رکنی ءَ شال ءَ آؤکیں گاڑی لورلائی ءَ وئیل ءِ آماچ بوتگ –

وئیل ءَ پاکستان تھریک انساپ گل بارکھان ءِ سرکماش میر طارق کیھتران ءَ ھوار چار مردم ٹپی بوتگ اَنت-

ٹپی بوتگیں مردم ھما دمان ءَ ھسپتال ءَ برگ بوتگ انت –