پہ ھیات ءَ انساپ ءِ لوٹ انگت برجاہ، زھرشانی، روانک ءُ یک شلیں کمپین جُنزگ ءَ اَنت۔
دی بلوچستان پوسٹ
ٹی بی پی رسانک پتر ءَ سر بیتگیں ھالانی رد ءَ سینزدہ اگست ءَ ایف سی ءِ دست ءَ تُربت آبسر ءَ جنگ بیتگیں ھیات مرزا ءِ کوش ءِ ھلاپ ءُ پہ انساپ ءِ لوٹ کنگ زھرشانی، روانک، ڈیوا روک کنگ ءُ چاگردی رسانکاں کمپین یکشل ءَ برجاہ اَنت۔
سر بیتگیں ھالانی ردءَ زندمانءِ جتاھیں پڑاں گوں سیادی داروکیں مردم وتی پیم ءَ پہ ھیات ءَ ستاشانی ءُ دروت پیش کنگ ءَ اَنت ءُ وتی درد ءُ دورانی درانگازی ءَ کنگ ءَ اَنت۔
ھمے وڑ ماجدہ بلوچ نامی ئیں یک بلوچ ازمکاری ءَ وتی ازم گوں یک پینٹنگے ءِ دروشم ءَ اڈ داتگ کہ آئی ءِ تھ ءَ ھیات ءِ جون ءِ کش ءَ آئی ءِ بزگیں ءُ لاچاریں مات ءُ پت گندگ بنت ءُ کش ءَ ھیات ءِ ھونی ئیں بیگ کپتگ ۔
دومی نیمگ ءَ سر بیتگیں ھالانی رد ءَ کراچی ءِ بازیں ھنکینانی تھ ءَ ڈیوا رژناہ کنگ ءُ پہ ھیات ءَ انساپ ءِ لوٹ کنگ بیتگ۔ اے دمگانی تھءَ ملیر، لیاری ءُ جھانگیرروڈ ءَ ھوار بازیں دمگ ھوار اَنت۔
اھوالکارانی ردءَ مروچی بلوچستان ءِ دمگ زھری ءَ ھم ھیات بلوچ ءِ کوش ءِ ھلاپ ءَ یک زھرشانی ءِ کنگ بیتگ کہ ایشی تھءَ بازیں مردماں بھر زرتگ۔
ھمے وڑ ءَ کیچ ءِ دمگ ناسر آباد ءَ ھم بلوچ مھلوک ءِ نیمگ ءَ پہ ھیات بلوچ ءَ ڈیوا روک کنگ بیتگ ءُ آئی ءِ یاتگیری ءَ رژناہ کنگ بیتگ اَنت –
یات بہ بیت چاگردی رسانکدر ءِ تندجاھانی تھ ءَ بیوکیں کمپین گوں #JusticeForHayatBaloch ءَ جُنزگ ءَ اَنت۔