ٹی بی پتر ھال ءَ سربوتگیں ھالانی گوستگیں روچ ءَ بلوچستان ءِ کاروباری شھر ھب ءَ ناشُناسیں مردماں اٹک سیمنٹ پیکٹری ءَ بمب تراکے کُتگ ، تراک ءَ سیمنٹ پیکٹری ءِ ورکشاپ ءِ تھا کنگ بوتگ، چریشی ءَ اٹک سیمنٹ پیکٹری ءِ ورکشاپ ءَ تاوان رس اِتگ ءُ تراک ھما وھد ءَ کنگ بوتگ کہ ورکشاپ ءَ کار برجاہ بوتگ- تراک ءِ آسر ءَ بازیں کاردار ھم زدگ بوتگ اَنت ـ زدگ بوتگیں مردم ھسپتال ءَ سر کنگ بوتگ انت ـ زدگ بوتگیں مردمانی ھمگرنچی پاکستان ءِ اُستان پنجاب ءَ اِنت کہ پہ روزگار ءِ ھاتر ءَ اٹک سیمنٹ پیکٹری ءَ کار ءَ بوتگ اَنت ـ
دومی نیمگ ءَ ھب اٹک سیمنٹ پیکٹری ءِ سر ءَ بوتگیں اُرش ءِ زمہ واری بی ایل اے ءَ منّ اِتگ ـ
بی ایل اے ءِ جارکش جئیند بلوچ ءَ رسانکدراں وتی شنگ کرتگیں درشان ءِ تھا گُشتگ کہ بی ایل اے ءِ سرمچاراں گوستگیں شپ ءَ بلوچستان ءِ شھر ھب چوکی ءَ زورگریں ریاست بلوچ ءِ ڈیھ ءِ سر ءَ بستگیں یک لٹ ءُ پلکارے ھب سیمنٹ پیکٹری ءِ سر ءَ بمب تراکے کُتگ ـ
آئی ءَ دیمتر ءَ گُشتگ کہ بی ایل اے ءِ سرمچاراں اے اُرش ساکران ءَ برجاھیں اٹک سیمنٹ پیکٹری ءِ یک ورکشاپے ءِ سر ءَ کُتگ ـ چریشی ءِ آسر ءَ ورکشاپ ءَ بازیں تاوان ءِ رس اِتگ وھدیکہ بازیں مردمے زدگ بوتگ ـ
بی ایل اے ءِ جارکش ءَ گوشتگ کہ ما پیش ءَ ھم اے پیکٹری سرپد کُرتگ کہ بلوچ ءِ مال ءُ مڈیانی لٹ ءُ پُل ءَ بند بہ کنت بلے بلوچ ڈیھے سر ءَ پیکٹری برجاہ دارگ، بلوچ ءِ مڈیاں چہ آ چلائینگ بنت ءُ آھانی چلائینگے ھاتر ءَ پاکستان دور ءَ چہ کار دار کاریت ءُ بلوچستان ءِ مڈیانی ریزینگ ءَ وھدیکہ بلوچ ءِ جند ملکیت وتی جاہ ءَ مزدوری ھم کنگ ءَ نیل اِیت. تراک ءَ زدگ بوتگیں مردم ھم ھمے وڈیں ریاستی چاریگ بوتگ انت کہ پہ بلوچ مال ءُ مڈیانی پُلگ ءِ ھاتر ءَ دور ءُ دریں دمگاں چہ آرگ بوتگ انت ـ کہ بی ایل اے مکن کنگ ءَ ابید لُٹ ءُ پُل ءِ اے پرکاری ءَ ھوار بوتگ انت ـ
گُڈ سر ءَ جارکش جئیند بلوچ ءَ گُشتگ کہ بی ایل اے یک رندے پد ءَ اٹک سیمنٹ پیکٹری ءَ بیھار دنت کہ آ وتی لُٹ ءُ پُل ءِ شوربندیاں بند بہ کنت آھاں بداریت اگاں ناں دیمتر ءَ اشی ءَ چہ ھم بیمناکتریں اُرش کنگ بیت ـ