ھرنائی ءَ پوج ءَ بیڑ برتگ

ھرنائی ءَ پوج ءَ بیڑ برتگ

دی بلوچستان پوسٹ

سر بیتگیں ھالانی رد ءَ ھرنائی ءِ دمگ نشپا ءَ پاکستانی پوج ءَ شوانگے ءِ گِس ءَ بیڑ برتگ ءُ اود ءَ زالبول ءُ چکاں ھوار چار مردم کُشتگ ءُ دو ورنا دزگیر کرتگ ءُ برتگ-

ھالانی تہ ءَ گوشگ بیتگ کہ پاکستانی پوج ءَ نشپا ءَ کیسر چھلگری مری ءِ گِس ءَ پاکستانی پوج ءَ بیڑ برتگ ءُ کیسر چھلگری، آئی ءِ نماسگ ناز بی بی ء مھمد الی چھلگری مری ءُ دو چُک کُشتگ اَنت –

بیڑی ءِ وھد ءَ پوج ءَ سرجمیں دمگ انگیر ءَ کرتگ ءُ روگ ءُ آیگی راہ ءُ در بستگ اَنت ءُ ھمے وھد ءَ پوج ءَ کیسر چھلگری ءِ دو چُک ھم پوج ءَ دزگیر کرتگ ءُ گوں وت برتگ اَنت –

زانگ گوستگیں روچ ءَ ھرنائی ءِ دمگ چھپر لٹ ءَ سلاہ بندیں مردماں لیویز ءِ یک چیک پوسٹے ءِ سر ءَ اُرش کرتگ اَت –

اُرش ءَ پد اُرش ءِ زمہ واری بلوچستان ءِ آجوئی لوٹوکیں گل بلوچ لبریشن آرمی ءِ جارکش جیئند بلوچ ءَ منّ اِتگ اَت ءُ گْوشتگ اَت کہ لیویز ءِ بنجل ءِ سر ءَ سرمچاراں اُرش کرتگ ءُ اود ءَ جاڑیگیں سلاہ ءُ دگہ جنگی ازباب دستیگ کرتگ اَنت، اُرش ءَ چَہ لیویز کارمنداں چیک پوسٹ یلہ کرتگ ءُ تتکگ اَنت –

جئیند ءَ گوشتگ اَت ھمے وڑ ءَ گوستگیں روچ ءَ ھم زرد آلو ءَ پاکستانی پوج ءِ چیک پوسٹے ءِ سر ءَ سرمچاراں بیڑ برتگ ءُ راکٹ ءُ دگہ سلاھانی گون ءَ اُرش کرتگ ءُ پوج ءَ جانی ءُ مالی تاوانی دیمپانی کنگ کپتگ –

زانگ بہ بیت بلوچستان ءِ جتائیں جاھاں سرمچارانی اُرشاں پد پاکستانی پوج لس میتگانی سر ءَ اُرش کنت ءُ اود ءَ ھرچی کہ آئی ءِ دست ءُ دپاں کپ ایت آئی ءَ وتی زوراکیانی نشانگ جوڑ کنت –

زانگ بہ بیت ھمے وڑ ءَ گوستانک ءَ کیچ ءِ جتائیں دمگاں ھم پوج ءَ بیڑیانی وھد ءَ پشدری ءَ تیرگواری کرتگ ءُ اود ءَ کسانیں زھگانی ساہ گپتگ اَنت –

کیچ بلیدہ ھنکین ءَ گوستانک ءَ یک بیڑے ءِ وھد ءَ تیرگواری کرتگ اَت اود ءَ پاتمہ نامی ئیں نامیں زالبولے کُشتگ اَت –

ھمے وڑ ءَ دشت ءَ ھم پاکستانی پوج ءَ سرمچارانی اُرش ءِ پشدر ءَ لس مھلوک ءِ سر ءَ تیرگواری کرتگ اَت اود ءَ نسرین نامیں زھگے کُشتگ اَت –

چِد ءُ پیسر بیسمہ ءَ ھم پاکستانی پوج ءَ بلوچ سرمچارانی میانی جنگ ءَ لس مھلوک ءِ سر ءَ تیرگواری کرتگ اَت اود ءَ ھلیمہ نامیں زالبولے کُشتگ اَت –

بلوچستان ءِ جتائیں جاھاں برجاھیں زوراکیانی تہ ءَ روچ پہ روچ گیشی آیگ گندگ بیگ ءَ اِنت ءُ سیاسی ءُ چاگردی مردمانی گوشگ اِنت کہ پاکستانی پوج لس بے گناھیں مردماں مپت ءِ ھد ءَ جنگ ءُ کُشگ اِنت –