پشتون تحفظ مومنٹ ءُ پاکستانی بنجاھی مھتری پتر ءِ باسک الی وزیر جھانی نادراھی کورونا ویروس ءُ گپتگ ۔
ھمے وڑ ءَ پی ٹی ایم ءِ رھشون ءُ پاکستان ءِ مھتر ءِ بنجاھی پتر باسک مھسن داوڑ ءَ وتی ٹویئٹر ءَ دو شمبے ءَ ٹویٹ کنان ءَ گْوشتگ کہ الی وزیر ءَ کورونا ویروس ءِ گورجنی ءِ شکی بیتگ چریشی ءَ آئی ءِ ٹپاسی بیتگ۔
مھسن داوڑ ءَ گوشت کہ ٹپاسی ءِ وھد ءَ آئی ءَ کورونا ویروس ءِ گورجنی راست بیتگ ءُ آ اے وھد ءَ جتائیں جاھے ءَ ڈبگ بیتگ۔
مھسن داوڑ ءَ وتی لوٹانی دزبندی ءَ چَہ الی وزیر ءِ واستا ءَ دوا کنگ ءِ دزبندی کُت ۔
زانگ بہ بیت گوستگیں سال ءَ الی وزیر گوریچانی وزیرستان ءَ پاکستانی لشکر ءِ چیک پوسٹ ءِ سر ءَ اُرش ءِ بھتامی ءَ دزگیر کنگ بیتگ اَت ءُ پد ءَ دپ زبانی ءَ ستمبر دوھزار ءُ نوزدہ ءَ یل کنگ بیتگ اَت۔
زانگ بہ بیت جھانی نادراھی ءَ اے وھد ءَ سرجمیں جھان مان پُچیتگ ءُ جھان ءَ کورونا ویروس ءَ گپتگیں مردمانی کَچ چار ٹِک دو ملین بیتگ ءُ 2 لَک 80 ءُ 6 ھزار مردم ءَ گیش بیران بیتگ ءُ 14 لَک مردم دراہ بیتگ –
پاکستان ءَ کورونا ویروس ءَ گپتگیں مردمانی کَچ 30 ءُ 2 ھزار ءُ 8 ھشت سد ءُ نوزدہ مردم نادراھی ءَ گورجتگ ھپت سد ءُ سِی ءُ سَے مردم بیران ءُ ھشت ھزار ءُ پنچ سد ءُ پنجاہ مردم دراہ بیتگ۔
جھانی تبزانتانی رد ءَ کورونا ویروس سرجمیں نادراھیاں چَہ مستریں نادراھی ءِ مردمانی زندمان ءَ پُلیت ھم کنت بلے دنیگتا کورونا ویروس ءِ جوان ءُ سرجمیں درمان ڈیھاں دز نہ کپتگ کہ آئی ءَ چَہ مردم رکینت کُت بہ کن آں۔