بلوچ لبریشن آرمی ءِ جارکش جیئند بلوچ ءَ گُشتگ کہ مئے سرمچاراں کلات ءِ دمگ شور پارود ءَ پاکستانی لشکر ءِ اڈ داتگیں وتساچیں مردم کوشیں لشکر ءِ کارندہ دلشاد گوں کَڈ کُتگیں شورواں ءَ نشانگ کُتگ ۔
نشانگ بیتگیں مرد شور پارود ءَ چیریں واکدارانی مستری ءَ جنزوکیں مردم کوشیں لشکر ءِ ھاسیں مردمے بیتگ، آ پوج ءِ پجیگ ءَ بازیں بیڑانی تھ ءَ ھوار بیتگ ءُ گوستگیں روچاں بلوچ لبریشن آرمی ءِ سرمچارانی شھیدی ءِ ویل ءَ گون بیتگ۔
بی ایل اے شور پارود ءُ کش ءُ کِر ءِ دمگانی تھ ءَ پاکستانی پوج ءِ مستری ءَ اڈ داتگیں مردم کوشیں لشکرانی سر ءَ دیمتر ءَ ھم گوں ترندی ءَ اُرش کنت۔
زانگ بہ بیت کہ مئی ءِ اولی روچ ءَ دی بلوچستان پوسٹ ءِ ھال پتر ءَ کلات ءِ کوھی دمگاں یک سلاھبندیں ویلے ءِ ھال داتگ اَت کہ ایشی ءِ تہ ءَ دوئیں نیمگاں چہ مردمی تاوان ءِ ٹاہ دیگ بیتگ اَت۔ دومی روچ ءَ بلوچ سلاھبندیں گل بلوچ لبریشن آرمی ءَ وتی یک شنگ کُتگیں درشانے ءِ تہ ءَ اے ھال ءِ پدراھی کنان ءَ گُشتگ اَت کہ اے سلاہ بندیں ویل پاکستانی لشکر ءُ آیانی گل ءِ نیام ءَ بیتگ ءُ داں بازیں ادارے ءَ بیوکیں اے جنگ ءِ نیام ءَ آیانی گل ءِ دو سرمچار شھداد بلوچ ءُ اھسان بلوچ بیران بیتگ اَنت۔
اھسان بلوچ ءُ شھداد بلوچ ءِ جَنَگ بیگ ءَ بلوچ سیاسی جھدکاراں ھوار آیانی ھمراہ، وانگجاہ ءِ سنگت، اُستاداں ھوار بلوچ لس مردماں ھم آیانی مرگ ایر جتگ اَت ءُ استانی زوراکیانی سر ءَ ترندیں درشان شنگ کُتگ اَت۔