بلوچستان ءِ جتاجتائیں دمگاں پاکستانی پوج سر ءَ ڈرون ءُ بمب اُرش ،باپاری گاڑیانی سر ءَ

بلوچستان ءِ جتاجتائیں دمگاں پاکستانی پوج ءِ سر ءَ ڈرون ءُ آئی ای ڈی اُرش ءُ باپاری گاڑیانی سر ءَ ھم اُرش کنگ بیتگ-

گیشیں ھالانی رِد ءَ مستونگ ءِ دمگ کھڈکوچہ ءَ پاکستانی پوج ءِ بُنجاھی بُنجل سر ءَ ڈرون اُرش کنگ بیتگ- اِھوالکار ءِ رِد ءَ پوج ءِ سر ءَ کم چہ کم دو ڈرون اُرش کنگ بیتگ چریشی ءِ آسر ءَ جانی ءُ مالی تاوان ءِ گمان اِنت-

ھمے وڑ کلات ءِ دمگ مرجان ءَ پاکستانی پوج ءِ یک گاڑی یے آئی ای ڈی تراک ءَ چہ نشانگ کتگ-

تراک ءِ آسر ءَ پوج ءِ گاڑی تباہ بیگ ھال اِنت بلے جانی تاوانانی درگت ءَ ھال دیم ءَ نیتکگ اَنت-

دومی نیمگ ءَ گوستگیں روچ ءَ شال تفتان باپاری دگ سر ءَ چاگی نوکچاہ ءَ سلاہ بندیں مردماں ناکہ بندی ءِ میان ءَ دو باپاری گاڑی دستیگ کتگ اَنت کہ اے گاڑیانی تہ ءَ یک گاڑی یے گرانبھائیں سنگ ءَ چہ لوڈ بیتگ-

ھمے وڑ دریجی ءَ ویراب ھب ءِ ھند سر ءَ سلاہ بندیں مردماں دہ ءَ چہ گیش سنگ بروکیں ٹرکانی ٹائر تیرگواری کتگ ءُ تراکینتگ اَنت-

تنی وھدے وئیلانی زمہ واری ھچ گل ءَ نہ زرتگ اَنت-