بلوچستان ءِ دمگ کیچ تمپ ءِ دمگ کوھاڈ ءَ سیادی دارولیں ورنا بلال بلوچ ءِ لاش دزکپتگ۔
دمگی مردمانی گشگ ءِ رد ءَ مرچی بلال بلوچ ءِ جون ھُشک آباد ءِ دمگ ءَ دست کپتگ۔ اے گپ کنگ بوتگ کہ آ چار روچ پیش چہ کوھاڈ بازار ءَ پاکستانی لشکر ءَ پہ زور بیگواہ کتگ۔
دمگی مردمانی گْوشگ اِنت کہ بلال بلوچ چار روچ پیش چَہ کوھاڈ بازار ءَ پاکستانی لشکر ءِ دست ءَ دزگیر کنگ ءَ پد بیگواہ بیتگ۔ آئی ءِ لاش مرچی ھشک آباد ءِ دمگ ءَ دزکپتگ۔
مردمانی گْوشگ اِنت کہ ھمے وئیل ءِ تہ ءَ بلال بلوچ ھم بیگواہ بیتگ کہ آئی ءِ تہ ءَ کوھاڈ ءِ نندوک عدیل ھم پہ زور بیگواہ کنگ بیتگ۔ عدیل ءِ لاش گوستگیں روچ ءَ دزکپتگ کنگ بوتگ۔
ھمے وڑ چہ جھل مگسی ءِ ھند گنداواگ ءَ پولیس تھانہ کوٹڑہ ءِ نزیک ءَ گھاترہ ءَ عرفان علی دیناری ءِ لاش دزکپتگ ۔
پولیس ءِ رد ءَ عرفان علی دیناری کھاری دمگ ڈرابھی ءَ سلاہ بندیں مردماں آوار جتگ بیتگ ۔ آئی ءِ لاش ءِ دزکپگ ءُ دگہ گپانی درگت ءَ اھوال دیم ءَ نیتکگ انت۔
چہ ھزدار کھٹان ءَ یک ورنایے لاش دزکپتگ کہ آئی ءِ پجار مھمد یونس ء مھمد یوسف غلامانی ءِ نام ءَ بوتگ۔
ھمے وڑ چہ پسنی کلانچ لنک روڈ ءَ یک لاشے دزکپتگ کہ آئی ءِ کیسگ ءَ دزکپتگیں پرچی ءَ لاش ءِ پجار ریھان نبشتگ بیتگ بلے تنی وھدی المی ئیں اھوال نیتکگ انت۔