کیچ: پاکستانی لشکر ءِ نیمگ ءَ جنین ءُ کسان سالیں زھگے آوار جنگ بیتگ انت
گوستگیں شپ ءَ کیچ ءِ دمگ سامی بلوچی بازار ءِ دمگ ءَ پاکستانی پوج ءَ چہ وتی لوگ ءَ زالبول گوں ھمراھے زھگے ءَ آوار جتگ ءُ برتگ انت۔
دمگی مردمانی رد ءَ پاکستانی لشکر ءُ آھانی سلاہ بندیں مردماں شپ ءِ دیر ءَ یک لوگے ءَ شُتگ ءُ چاردر ءُ چار دیواری لگتمال کنان ءَ جنین ءُ آئی ءِ کسان سالیں جنک گوں وت برتگ اَنت۔
دمگی مردماں زالبول ءِ پجار لطیف ءِ چُک ھانی ءِ نام ءَ کتگ ءُ جنک ءِ پجار علی جان ءِ چُک عائشہ ءِ نام ءَ بوتگ۔
کھول ءِ مردم ءُ دمگی وسیلگ گْوشتگ کہ اے وئیل ءَ پد اے دوئیں مردمانی بابت ءَ ھچ وڑیں ھال ءُ اھوال پدر نہ بوتگ ءُ ھما جاہ ءِ بابت ءَ ھم ھال ءُ اھوال دست نہ کپتگ کہ آ کجام جاہ ءَ برگ بوتگ اَنت۔