بلوچستان ءِ دمگ سوراب گدر ءَ پاکستانی پوج ءِ برزی اُرش ءِ آسر ءَ شھریانی کوش ءِ ھلاپ ءَ پشمبے ءِ روچ ءَ بلوچستان ءِ جتا جتائیں دمگاں تھتک بند ءُ دربندیں ھڑتال برجاہ انت ءُ ھمے وڑ ءَ سانمندیں کھولاں لاش ایر کتگ ءِ مزن شھدگ ءِ سر ءَ زھرشانی کتگ-
بلوچ یکجھتی کمیٹی ءِ نیمگ ءَ داتگیں ھڑتال کال ءِ رِد ءَ سوراب، خضدار، کلات، مستونگ، نوشکی ، کلات ءُ دگہ دمگاں بازیں واپاری بنجل ءُ دکان بند اَنت۔ بازیں جاھاں ٹریفک ءِ روانی ھم سانمند بیتگ-
سوراب ءَ زھرشانی ءِ سبب ءَ کوئٹہ کراچی نیشنل ہائی وے ءِ سر ءَ ٹریپک ھاسیں رنگے ءَ سانمند بیتگ کہ اود ءَ زھرشانی کنوکاں اُرش ءَ بیران بوتگیں مردمانی لاش ایر کنگ ءَ زھرشانی کتگ۔ دمگی ھالانی رد ءَ شاہراہ ءِ دوئیں نیمگاں گاڑیانی دراجیں لین لگ اتگ اَنت۔
دمگی مردم ءُ زھرشانی کنوکیں مردمانی رد ءَ 12 اگست ءَ سوراب ءِ گدار گندان ءِ دمگ ءَ برزی اُرش ءَ چہ زالبول ءُ چُکاں ھوار 20 ءَ گیش مردم بیران ءُ 16 ٹپیگ بوتگ اَنت۔
اُرش ءَ پد بیران بوتگیں مردمانی سیاد ءُ دمگی مردماں سوراب ءِ مستریں شھدگ شال کراچی نیشنل ہائی وے ءِ سر ءَ جون ایر کتگ اَنت ۔
زھرشانی کنوکانی گْوشگ اِنت کہ داں ایشانی لوٹ پیلو کنگ مہ بنت اے زھرشانی ءُ دھرنا برجاہ مان اَنت۔ شاہراہ ءِ بند کنگ ءَ چہ بلوچستان ءِ اندری دمگاں گوں کراچی ءُ شال ءَ ہمگرنچیں مستریں زمینی راہ سستگ۔